जनकपुरधामका शक्तिपीठमा घटस्थापनासँगै भक्तजनको घुइँचो

जनकपुरधाम/असोज २५ गते। नेपालीहरूको महान् पर्व बडादशैँ आइतबार घटस्थापनासँगै देशभर सुरु भएको छ। दशैँको पहिलो दिन मिथिलाको सांस्कृतिक केन्द्र जनकपुरधामस्थित प्रमुख शक्तिपीठहरूमा बिहानैदेखि भक्तजनहरूको घुइँचो लागेको छ। शक्तिपीठहरूमा परम्परागत विधिअनुसार घटस्थापना गरी शारदीय नवरात्रको पूजा आरम्भ गरिएको छ।

दशैँको सुरुवातसँगै जनकपुरधामस्थित ऐतिहासिक राजदेवी मन्दिर, बौधी माई मन्दिर, विद्यापति चोकस्थित दुर्गा मन्दिर र रामानन्द चोकस्थित दुर्गा मन्दिरलाई आकर्षक रूपमा सिँगारिएको छ। मन्दिरहरूमा विशेष सजावट गरिएको छ भने पूजाआजा र दर्शनका लागि आउने भक्तजनको चहलपहल बढेको छ।

जनकपुरधामको प्रमुख शक्तिपीठका रूपमा रहेको राजदेवी मन्दिरमा शारदीय नवरात्रको अवसरमा घटस्थापनादेखि महानवमीसम्म विशेष पूजाआजा गर्ने परम्परा छ। सोही परम्पराअनुसार आइतबार बिहान शुभ साइतमा तान्त्रिक विधिबाट गणेश कलश, भैरव कलश र दुर्गा कलश स्थापना गरिएको छ।

कलश स्थापनासँगै माता दुर्गाको आह्वान गर्दै वैदिक मन्त्रोच्चारणका साथ नवरात्रको पूजा सुरु गरिएको हो। नवरात्रका नौ दिनसम्म देवी दुर्गाका विभिन्न स्वरूपको आराधना गरिने भएकाले जनकपुरधामका शक्तिपीठहरूमा धार्मिक गतिविधि बढेको छ।

दशैँका अवसरमा जनकपुरधामका शक्तिपीठहरूमा हुने विशेष पूजाआजा तथा धार्मिक अनुष्ठानमा सहभागी हुन धनुषासहित आसपासका विभिन्न जिल्लाबाट समेत श्रद्धालुहरू आउने गर्छन्। विशेषगरी राजदेवी मन्दिरमा नवरात्रको अवधिभर भक्तजनको उल्लेख्य उपस्थिति रहने गरेको छ।

भक्तजनको चापलाई ध्यानमा राख्दै मन्दिर व्यवस्थापन समितिले दर्शन तथा सुरक्षाको व्यवस्था मिलाएको जनाएको छ। नवरात्रको सुरुवातसँगै जनकपुरधामका मठमन्दिरहरूमा धार्मिक वातावरण थप उत्साहपूर्ण बनेको छ।

धार्मिक आस्थासँगै मिथिलाको सांस्कृतिक परम्परासमेत जोडिएको बडादशैँले जनकपुरधाममा विशेष रौनक ल्याएको छ। घटस्थापनासँगै सुरु भएको नवरात्रको नौ दिनसम्म देवी दुर्गाको आराधना, पूजापाठ र धार्मिक अनुष्ठान जारी रहनेछन्।