स्वास्थ्यको कारण देखाउँदै बंगलादेशका राष्ट्रपति शहाबुद्दीनले दिए राजीनामा

ढाका/साउन ८ गते। राष्ट्रपति मोहम्मद शहाबुद्दीनले राजीनामा दिएका छन। राष्ट्रपति शहाबुद्दीनले शुक्रबार सभामुख हाफिज उद्दिन अहमदलाई पत्र बुझाएर अन्तरिम राष्ट्रपति पदको लागि संवैधानिक प्रक्रिया सुरु गरेका हुन । ।

आफ्नो राजीनामा पत्रमा शाहबुद्दीनले धेरै स्वास्थ्य जटिलताका कारण संवैधानिक पदको जिम्मेवारी वहन गर्न अब शारीरिक र मानसिक रूपमा सक्षम नभएको बताए।

उनले लेखेका छन, “म गम्भीर बिरामी छु। म मुटु रोग, उच्च रक्तचाप, मधुमेह र मृगौला जटिलताबाट पीडित छु। मेरो मुटुको बाइपास सर्जरी गरिएको छ। हालै, एक चिकित्सा परीक्षणमा मलाई अटोनोमिक न्यूरोपैथी भनिने रोग लागेको पत्ता लागेको छ। यस रोगका कारण म कहिलेकाहीं छोटो समयको लागि होस गुमाउँछु। यी रोगहरूको संयुक्त प्रभाव र परिणामस्वरूप शारीरिक र मानसिक अशक्तताको कारण, अब मलाई राष्ट्रपति जस्तो महत्त्वपूर्ण संवैधानिक पदको जिम्मेवारी निर्वाह गर्न सम्भव छैन। मलाई दीर्घकालीन चिकित्सा उपचार चाहिन्छ, यी परिस्थितिहरूमा, संविधानको धारा ५० (३) को प्रावधान अनुसार म यसद्वारा राष्ट्रपतिको पदबाट राजीनामा दिन्छु।”

राष्ट्रिय संसदका सभामुख हाफिज उद्दिन अहमदले शुक्रबार साँझ ५ बजे आपतकालीन पत्रकार सम्मेलन बोलाएका छन् ।

संविधानको धारा ५४ अन्तर्गत पद रिक्त भएपछि नयाँ राष्ट्रपतिले पदभार ग्रहण नगरेसम्म सभामुखले राष्ट्रपतिको कर्तव्यहरू सम्पादन गर्नेछन्। धारा ५४ मा भनिएको छ कि यदि राष्ट्रपतिको पद रिक्त हुन्छ वा अनुपस्थिति, बिरामी वा अन्य कुनै कारणले राष्ट्रपतिले पदको कर्तव्यहरू सम्पादन गर्न असमर्थ भएमा सभामुखले नयाँ राष्ट्रपतिको निर्वाचन नभएसम्म राष्ट्रपतिको कर्तव्यहरू सम्पादन गर्नेछन्।

बंगलादेशको संविधानको धारा १२३ (२) मा भनिएको छ, ‘मृत्यु, राजीनामा वा बर्खास्तगीका कारण राष्ट्रपतिको पद रिक्त भएमा अर्को ९० दिन भित्र नयाँ राष्ट्रपतिको निर्वाचन गर्नुपर्छ।’

मोहम्मद शहाबुद्दीनले अप्रिल २४, २०२३ मा अवामी लिग सरकारको समयमा ५ वर्षको कार्यकालको लागि बंगलादेशको २२ औं राष्ट्रपति बन्नु अघि २०११ देखि २०१६ सम्म भ्रष्टाचार निवारण आयोगको आयुक्तको रूपमा सेवा गरेका थिए। उनी अप्रिल २०२८ सम्म पदमा रहने थिए तर आफ्नो कार्यकाल पूरा गर्नु अघि लगभग २ वर्ष राजीनामा दिए।

अगस्ट ५, २०२४ मा भएको राजनीतिक परिवर्तनपछि, भेदभाव विरोधी विद्यार्थी आन्दोलन लगायत धेरै राजनीतिक दलहरूले उनलाई हटाउन माग गरेका थिए। संवैधानिक कारणहरू उल्लेख गर्दै अन्तरिम सरकारले उनलाई हटाएको थिएन र पछि यो मुद्दा साम्य भयो।

फेब्रुअरी १२ मा राष्ट्रिय संसदको चुनावमा विजय हासिल गरेपछि बंगलादेश राष्ट्रवादी पार्टीले सरकार गठन गरे पछि राष्ट्रपतिलाई प्रतिस्थापन गर्ने बारेमा छलफल फेरि सुरु भएको थियो । राष्ट्रवादी पार्टीका नेताहरूले मार्चमा भनेका थिए कि राष्ट्रपतिको कार्यकालमा अझै समय बाँकी रहेकोले पार्टी भित्र यो विषयमा छलफल भएको थिएन। ४ महिना पछि शहाबुद्दीनको राजीनामाको खबर आयो।