नयाँदिल्ली/साउन ३ गते। नयाँ दिल्लीको भारत मण्डपममा शनिबार आयोजित एक कार्यक्रममा ‘रामायणः प्रथम संकल्प’ चलचित्रको ट्रेलर सार्वजनिक गरियो।
यस अवसरमा निर्देशक नितेश तिवारी, निर्माता नमित मल्होत्रा र चलचित्रका कलाकारहरू उपस्थित थिए। निर्माताहरूले उक्त ट्रेलर २४ जुलाईमा डिजिटल प्लेटफर्महरू मार्फत विश्वभर सार्वजनिक गरिने घोषणा गरेsf।
यस कार्यक्रममा भगवान रामको भूमिका निर्वाह गरिरहेका रणवीर कपुरका साथै साई पल्लवी, यश, सनी देओल, रवि दुबे र विवेक ओबेरोय लगायतका कलाकारहरूको उपस्थिति थियो। कार्यक्रमका क्रममा रणवीर कपुरले सनी देओलको आशीर्वाद लिन उनको खुट्टा छोए। मञ्चमा यशले हिन्दीमा बोल्ने प्रयास गरे तर जिब्रो लरबराउँदा उनले झुक्किएर ‘अवसर’ को सट्टा ‘अवकाश’ शब्द प्रयोग गरे।
करिब चार मिनेट लामो यस ट्रेलरले चलचित्रको आकर्षक दृश्य, भव्य रूपमा निर्माण गरिएको यसको संसार र मुख्य पात्रहरूको विस्तृत झलक प्रस्तुत गरेको छ। यस चलचित्रमा रणवीर कपुर भगवान् रामको, साई पल्लवी सीताको, यश रावणको, सनी देओल हनुमानको र रवि दुबे लक्ष्मणको भूमिकामा देखिने छन् भने सन् १९८७ को टेलिभिजन कार्यक्रम ‘रामायण’ मा रामको भूमिका निर्वाह गरेका अरुण गोविल यस चलचित्रमा राजा दशरथको भूमिकामा देखिनेछन्।
यस चलचित्रको कुल बजेट करिब ४,००० करोड रुपैयाँ रहेको बताइएको छ, जसले यसलाई भारतीय चलचित्र जगतकै सबैभन्दा महँगो चलचित्रहरूमध्ये एक बनाएको छ।
यस चलचित्रको निर्देशन नितेश तिवारीले गर्दैछन, जसले सर्वाधिक कमाइ गर्ने भारतीय चलचित्र ‘दंगल’ को निर्देशन गरेका थिए भने यस चलचित्रको संगीत ओस्कार विजेता एआर रहमान र हलिउड संगीतकार हान्स जिमरले तयार पार्दै हुनुहुन्छ।
यस चलचित्रको निर्माण नमित मल्होत्राको ‘प्राइम फोकस स्टुडियोज’, ‘डीएनईजी’ र यशको ‘मोन्स्टर माइन्ड क्रिएसन्स’ले गर्दैछन्। यो चलचित्र ‘आईम्याक्स’ मा प्रदर्शन गरिनेछ। ओस्कार विजेता स्टुडियो ‘डीएनईजी र प्राइम फोकसले यस चलचित्रको भिजुअल इफेक्ट्सको काम सम्हाल्दै छन्।
विशेष गरी ‘रामायणः भाग १’ सन् २०२६ को दीपावलीमा हलहरूमा प्रदर्शन हुनेछ भने ‘रामायणः भाग २’ सन् २०२७ को दीपावलीमा प्रदर्शन गरिनेछ।
Discussion about this post