शाहरूखले किने नयाँदिल्लीमा ३७ करोडमा घर, छ यसमा उनका धेरै याद

मुम्बई/असार २८ गते। बलिउड अभिनेता शाहरुख खान दक्षिण दिल्लीको उच्चस्तरीय क्षेत्र ‘पञ्चशील पार्क’ मा रहेको त्यो पूरै भवनका एक मात्र मालिक बनेका छन्, जहाँ उनले विवाहपछि आफ्नो जीवनको सुरुवात गरेका थिए। यस आवासीय भवनको बेसमेन्ट र पहिलो तलाको स्वामित्व उनीसँग पहिले नै थियो।

अहिले उनीहरूले सो भवनको दोस्रो र तेस्रो तला पनि खरिद गरेका छन्। ‘मनी कन्ट्रोल’का अनुसार शाहरुखले यी थप तलाहरूका लागि करिब ३७ करोड भारतीय रुपैयाँ तिरेका थिए। यो घर शाहरुख र गौरी खानका लागि विशेष महत्त्व यसकारण पनि रहेको छ किनकि मुम्बई सर्नु अघि सन् १९९१ मा विवाह पछि उनीहरू यहीँ बसेका थिए ।

यो सम्पत्ति दक्षिण दिल्लीको सबैभन्दा महँगो आवासीय क्षेत्रमध्ये एक पञ्चशील पार्कमा अवस्थित छ। यसको कुल क्षेत्रफल करिब १०,८०० वर्ग फिट रहेको छ। प्राप्त जानकारी अनुसार यस कारोबारको मूल्य करिब ३७ करोड रुपैयाँ छ र जग्गाको मूल्य प्रति वर्ग फिट करिब ३४ हजार २६० भारतीय रुपैयाँ अनुमान गरिएको छ। यो खरिदसँगै अब शाहरुख खान आधिकारिक रूपमा उक्त सम्पूर्ण भवनका मालिक बनेका छन्।

शाहरुख खान र गौरी खानको विवाह सन् १९९१ को अक्टोबर २५ मा भएको थियो। उनीहरूको विवाहमा तीनवटा फरक फरक विधिहरू समावेश थिए, कोर्ट म्यारिज (कानुनी विवाह), परम्परागत हिन्दू विवाह र निकाह। विवाह लगत्तै यो जोडी यही घरमा बस्न थालेको थियो। त्यसको केही समयपछि नै शाहरुख चलचित्र क्षेत्रमा पूर्णकालीन करियर बनाउन मुम्बई सरे। त्यसैले उनीहरू दुवैको यस घरसँग गहिरो भावनात्मक सम्बन्ध छ।

गौरी खानले एक पुरानो अन्तर्वार्तामा यस घरको महत्त्वबारे चर्चा गरेकी थिइन्। उनले आफू दिल्लीकी बासिन्दा भएको र आफ्नो जीवनको ठूलो हिस्सा त्यहीँ बिताएको कुरा उल्लेख गरेकी थिइन्। त्यसैले, उनी आफ्नी आमाको घर नजिकै एउटा घर किनेर त्यसलाई सजाउन चाहन्थिन्, एउटा यस्तो ठाउँ जहाँ परिवारका सबै सम्झनाहरू एकै छाना मुनि सँगालेर राख्न सकियोस्। गौरीका अनुसार घरको हरेक कुनाले उनलाई आफ्ना छोराछोरीको हुर्काइका विभिन्न चरणहरूको सम्झना दिलाउँछ।

गौरी खानले बताएकी थिइन् कि घरमा बालबालिकाको बाल्यकालका विभिन्न सामग्रीहरू समेटिएको एउटा ‘नोस्टाल्जिया वाल’ तयार पारिएको छ। यस भित्तामा सुहानाका मेकअप ब्रस, आर्यनको ब्याडमिन्टन र्‍याकेट, अबरामको पहिलो जन्मदिनको उपहार र शाहरुखले बनाएका कलाकृतिहरू राखिएका छन्। साथै, शाहरुखले उपहार दिएका सुन्दर पुरातात्विक वस्तुहरू र पोस्टकार्डहरू पनि फ्रेम गरेर त्यहाँ सजाइएको छ। गौरीले यस ठाउँलाई घरको आफ्नो सबै भन्दा मनपर्ने कुनाको रूपमा वर्णन गरेकी थिइन्।