कर्मचारी कुटिएको विरोधमा कालिकामाई गाउँपालिका तीन दिनदेखि ठप्प

वीरगञ्ज/असार २५ गते। पर्साको कालिकामाई गाउँपालिकाका कम्प्युटर अपरेटर चन्दन कुमार चौरसियामाथि कार्यालयभित्रै कुटपिट भएको घटनाको विरोधमा गाउँपालिकाका कर्मचारीहरूले तीन दिनदेखि पेनडाउन आन्दोलन जारी राखेका छन्।

दोषीमाथि कडा कानुनी कारबाहीको माग गर्दै कर्मचारीहरूले गाउँपालिकाको सम्पूर्ण प्रशासनिक सेवा ठप्प पारेका छन्।

गत मंगलबार कार्यालय समयमै गाउँ कार्यपालिकाको कार्यालयभित्र चौरसियामाथि कुटपिट तथा दुर्व्यवहार भएको भन्दै कर्मचारीहरूले सोही दिनदेखि आन्दोलन सुरु गरेका हुन्। आन्दोलनका कारण गाउँपालिकाका प्रशासनिक सेवा मात्र होइन, बुधबारदेखि मातहतका विद्यालय र स्वास्थ्य चौकीको सेवा पनि प्रभावित बनेको छ।

घटनाको तीन दिन बितिसक्दा पनि किटानी जाहेरी दर्ता नभएको र मुख्य आरोपितहरू पक्राउ नपरेको भन्दै आन्दोलनरत कर्मचारीहरूले बिहीबार जिल्ला प्रहरी कार्यालय पर्सा अगाडि धर्ना दिएका छन्।

कर्मचारीहरूका अनुसार कालिकामाई गाउँपालिका–३ का वडाध्यक्ष सञ्जय कुमार पटेल, गाउँपालिका–२ निवासी आफूलाई जेनजी अगुवा बताउने राजनिश कुशवाहा तथा हिरालाल राउत कुर्मीविरुद्ध आपराधिक उपद्रव मुद्दामा किटानी जाहेरी दर्ताका लागि निवेदन दिइएको भए पनि प्रहरीले दर्ता नगरेको आरोप लगाएका छन्। घटनास्थलको सीसीटीभी फुटेजमा कुटपिटको दृश्य स्पष्ट देखिए पनि प्रहरीले निष्पक्ष अनुसन्धान नगरेको उनीहरूको दाबी छ।

कर्मचारीहरूले सरकारी कार्यालयभित्र कार्यरत कर्मचारीमाथि कार्यालय समयमै भएको आक्रमण सम्पूर्ण कर्मचारी समुदायमाथिको आक्रमण भएको बताएका छन्। उनीहरूले दोषीलाई संघीय कानुनबमोजिम कारबाही गर्न, सरकारी कर्मचारीको सुरक्षा सुनिश्चित गर्न तथा घटनामा संलग्न सबैलाई कानुनी दायरामा ल्याउन माग गरेका छन्।

प्रमुख प्रशासकीय अधिकृत केशव कुमार अधिकारीले घटनाले कर्मचारीहरूको मनोबल कमजोर बनाएको, प्रशासनिक कामकाज प्रभावित भएको तथा सुशासनमा समेत नकारात्मक असर परेको बताए।

गाउँपालिका अध्यक्ष बशिष्ट कुमार गुप्ताले कर्मचारीमाथि भएको कुटपिटको घटनालाई निन्दनीय भएको भन्दै घटनामा संलग्न जो–कोहीलाई पनि कानुनबमोजिम कारबाही हुनुपर्ने बताए।

उता जिल्ला प्रहरी कार्यालय पर्साले घटनामा संलग्न रहेको आरोपमा कालिकामाई गाउँपालिका–२ निवासी रामबालक साह कानु र अरविन्द चौरसियालाई नियन्त्रणमा लिएर अभद्र व्यवहारसम्बन्धी मुद्दा दर्ता गरी अनुसन्धान अघि बढाइएको जनाएको छ। साथै घटनामा संलग्न अन्य व्यक्तिको खोजी तथा अनुसन्धान जारी रहेको प्रहरीले जनाएको छ।