अमेरिकाले जमिन मुनी किन राख्यो, २५० बर्ष पछि मात्रै खोलिने ‘टाइम क्याप्सुल’

वासिंगटन डिसी/असार २१ गते । अमेरिकी स्वतन्त्रताको २५०औँ वार्षिकोत्सवको अवसरमा जुलाई ४ मा ४०८ किलोग्राम तौल भएको एउटा ‘टाइम क्याप्सुल’ जमिन मुनि गाडिएको छ । यसलाई फिलाडेल्फियास्थित ‘इन्डिपेन्डेन्स नेसनल हिस्टोरिकल पार्क’ मा गाडिएको हो र २५० वर्ष पछि अर्थात् सन् २२७६ मा मात्र खोलिनेछ।

यो जानकारी राष्ट्रिय निकुञ्ज सेवाको आधिकारिक अभिलेखमा पनि रेकर्ड गरिएको छ ताकि भावी पुस्ताहरूले अबदेखि २५० वर्षपछि यसलाई पत्ता लगाउन र यसको बारेमा जान्न सकून्।

क्याप्सुलमा ५० राज्यहरू र आम जनताद्वारा छनोट गरिएका स्मृति चिन्हहरू छन्, जसमा ह्वेलको हड्डी, विश्वको सबैभन्दा ठूलो जिप्सम मरुभूमिबाट बालुवा, राइट दाजुभाइको विमानबाट कपडा, एआई भविष्यवाणी र विभिन्न ऐतिहासिक कागजातहरू समावेश रहेका छन्।

‘टाइम क्याप्सुल अर्थात समय पेटिका भनेको एउटा सिल गरिएको बाकस वा पात्र हो, जसमा कुनै खास युगका वस्तुहरू सुरक्षित राखिन्छन् ताकि भावी पुस्ताले त्यस समयको समाज, प्रविधि, संस्कृति र जीवनशैलीबारे बुझ्न सकून्।

‘टाइम क्याप्सुल’ तयार पार्नु भन्दा यसलाई २५० वर्षसम्म सुरक्षित राख्नु बढी चुनौतीपूर्ण थियो। वैज्ञानिकहरूका सामु सबैभन्दा ठूलो प्रश्न यो थियो कि जमिनमुनि गाडिएका वस्तुहरू साढे दुई शताब्दीसम्म पनि कसरी अक्षुण्ण रहन सक्छन् भन्ने कुरा सुनिश्चित गर्ने।

यसै कारणले गर्दा यस परियोजनासँग सम्बन्धित विभिन्न विज्ञहरूलाई संलग्न गराइयो। वर्षौको अनुसन्धानपछि, उक्त क्याप्सुललाई पानी, ओसिलोपन, खिया र बाह्य वातावरणीय तत्वहरूबाट जोगाउन सक्ने एउटा डिजाइन तयार पारियो।

यो क्याप्सुल वर्गाकार नभई बेलनाकार आकारको छ। वैज्ञानिकहरूका अनुसार वर्गाकार कन्टेनरका कुनाहरू समयसँगै कमजोर हुँदै जान्छन्, जसले गर्दा तिनै ठाउँबाट पानी भित्र पस्ने उच्च जोखिम रहन्छ।

कार्यक्रमको दिन क्याप्सुललाई सिल गरिने छैन, यो पहिले नै पूर्ण रूपमा सिल गरि सकिएको छ। जुलाई ४ मा यसलाई केवल फिलाडेल्फियामा जमिनमुनि राखिएको हो ।

क्याप्सुल सिल गर्न ‘इन्डियम’ नामक विशेष धातुको प्रयोग गरिएको छ। यो नरम धातुले बिर्को बन्द गर्दा सानाभन्दा साना खाली ठाउँहरू पनि भरिदिन्छ, जसले गर्दा क्याप्सुल पूर्ण रूपमा सिल भएर रहन्छ र भित्रका सामग्रीहरू लामो समयसम्म सुरक्षित रहन्छन्।

यदि क्याप्सुलभित्र अत्यधिक चिस्यान भएको भएमा कागज र अन्य सामग्रीहरू बिग्रन सक्थे। अर्कोतर्फ, चिस्यानलाई पूर्ण रूपमा हटाउँदा केही वस्तुहरू सुकेर फुट्न सक्थे। त्यसैले, वैज्ञानिकहरूले क्याप्सुलभित्र ३५ प्रतिशत मात्रा कायम राखेका छन्।

यो क्याप्सुललाई करिब १० फिटको गहिराइमा गाडिने छ। यस गहिराइमा तापक्रममा हुने उतारचढाव नगण्य हुन्छ, साथै अत्यधिक गर्मी, कडा जाडो र सतहमा चल्ने आँधीबेहरीको प्रभाव पनि निकै कम हुन्छ।