रणवीर कपुरको ‘रामायण’ रावणलाई केन्द्रमा राखेर बनिरहेको दावी

मुम्बई/असार १९ गते। रणवीर कपुर अभिनित चलचित्र ‘रामायण’ मा यशले रावणको भूमिका निर्वाह गर्दैछन्। साथै, उनी यस चलचित्रका सह– निर्माता पनि हुन्। चलचित्र निर्माताहरूले यसलाई रावणको दृष्टिकोणबाट प्रस्तुत गर्ने दाबी गरिएको छ।

यो दाबी टेलिभिजन अभिनेता आदित्य देशमुखको एउटा भनाइमा आधारित छ। सुरुमा आदित्यलाई यस चलचित्रमा राजा दशरथको भूमिकाका लागि छनोट गरिएको थियो तर पछि उनी यसबाट बाहिरिए र उनको ठाउँमा अर्का अभिनेतालाई राखियो। यद्यपि, ‘रामायण’ बारे उनले दिएको अभिव्यक्ति अहिले इन्टरनेटमा भाइरल भइरहेको छ।

आदित्यले ‘पुनर्विवाह’ र ‘बडे अच्छे लगते हैं’ जस्ता टेलिभिजन कार्यक्रमहरूमा काम गरिसकेका छन्। जब ‘रामायण’ का कास्टिङ निर्देशक मुकेश छाब्राले उनलाई राजा दशरथको भूमिकाका लागि बोलाए, उनले सफलतापूर्वक अडिसन पास गरेका थिए । तर, ‘सुहागन’ धारावाहिकका निर्माताहरूले उनलाई सुटिङमा जान अनुमति दिएनन् किनभने दुवै परियोजनाको समय तालिका जुधिरहेको थियो। फलस्वरूप, उनले ‘रामायण’ को अवसर गुमाउनुपर्यो। यद्यपि, पछि सिर्जनात्मक मतभेदका कारण उनले ‘सुहागन’ पनि छोडे। त्यसपछि उनी ‘रामायणु का निर्माताहरूकहाँ पुनः पुगे तर त्यतिन्जेलसम्म त्यो भूमिकामा अर्का कलाकार छनोट भइसकेका थिए– यो कुराप्रति आदित्यलाई आज पनि पछुतो लाग्छ।

प्रसंगवश, दुई वर्षअघि आदित्यले ‘टेलि टक इन्डिया’ युट्युब च्यानललाई एक अन्तर्वार्ता दिएका थिए। त्यसमा उनले आफूले राजा दशरथको युवा अवस्थाको भूमिका निर्वाह गरिरहेको र अरुण गोभिलले भने वृद्धअवस्थाको भूमिका निभाएको कुरा बताएका थिए। कुराकानीका क्रममा आदित्यले ‘रामायण’ रावणको दृष्टिकोणबाट निर्माण भइरहेको र त्यसैले निर्माताहरू उनको (दशरथको) रित्रमा पनि केही परिवर्तन गर्न चाहेको उल्लेख गरेका थिए।

आदित्यले यी कुराहरू दुई वर्षअघि भनेका थिए, त्यतिबेला उनी यस चलचित्रको हिस्सासमेत थिएनन्। तैपनि, अहिले सामाजिक सञ्जालमा उक्त भिडियो क्लिप भाइरल भइरहेको छ। मानिसहरू अनुमान लगाउँछन् कि चलचित्र निर्माताहरू ‘रावण’ को पात्रप्रति सहानुभूति जगाउन चाहन्छन्। कसै–कसैको भनाइ छ कि यश आफैं निर्माता भएकाले नमित मल्होत्राले प्रशंसकहरूलाई खुसी पार्ने काम गरिरहेका छन्। यद्यपि, अहिले नै यसबारे निश्चित रूपमा भन्न गाह्रो छ।