मधेस प्रदेशसभाको बैठक प्रतिपक्षको अवरोधका कारण स्थगित

जनकपुरधाम/असार १८ गते । आगामी आर्थिक वर्ष २०८३/८४ को विनियोजन विधेयकलाई लिएर उत्पन्न राजनीतिक विवादका कारण मधेस प्रदेशसभाको बैठक अनिश्चित बनेको छ। बजेट संशोधनको माग गर्दै प्रमुख प्रतिपक्षी दलहरूले अवरोध जारी राखेपछि प्रदेशसभा बैठक अझै सञ्चालन हुन सकेको छैन।

बुधबार दिउँसो १ बजेका लागि बोलाइएको प्रदेशसभा बैठक प्रतिपक्षी दल जनता समाजवादी पार्टी (जसपा) नेपाल र जनमत पार्टीका सांसदहरूको विरोधपछि सुरु भएको केहीबेरमै स्थगित गरिएको थियो। त्यसयता बैठक पुनः सञ्चालनका लागि सत्ता पक्ष र प्रतिपक्षबीच लगातार छलफल भइरहे पनि सहमति हुन सकेको छैन।

प्रतिपक्षी दलहरूले प्रदेश सरकारले असार १ गते प्रस्तुत गरेको बजेटमा व्यापक त्रुटि रहेको, साना तथा टुक्रे योजनामा बजेट बाँडिएको तथा प्रतिपक्षी निर्वाचन क्षेत्रप्रति विभेद गरिएको आरोप लगाएका छन्। उनीहरूले बजेटमा आवश्यक संशोधन नभएसम्म प्रदेशसभा बैठक सञ्चालन हुन नदिने स्पष्ट अडान लिएका छन्।

प्रदेशसभा बैठक सुचारु गराउने उद्देश्यले सभामुख रामअशिष यादवको पहलमा दुवै पक्षबीच संवाद जारी रहेको छ। प्रदेशसभा सचिवालयका सचिव बासुप्रसाद कोइरालाले दलहरूबीच सहमतिका लागि छलफल भइरहेको र सहमति जुटेपछि मात्रै बैठकको नयाँ मिति तय गरिने जानकारी दिए।

बुधबारको बैठकमा प्रतिपक्षी सांसदहरूले सरकारले आफ्नै नीति तथा कार्यक्रममा उल्लेख गरेका प्राथमिकतासमेत बजेटमा समावेश नगरेको तथा बजेट वितरणमा पक्षपातपूर्ण व्यवहार गरेको आरोप लगाएपछि सभामुखले बैठक १० मिनेटका लागि स्थगित गरेका थिए। तर त्यसपछि पनि सहमति हुन नसक्दा बैठक अझै अनिश्चित अवस्थामा रहेको छ।

यसअघि मधेस प्रदेश सरकारले आगामी आर्थिक वर्ष २०८३/८४ का लागि ४१ अर्ब १३ करोड ८६ लाख रुपैयाँको बजेट सार्वजनिक गरेको थियो। अर्थमन्त्री युवराज भट्टराईले कृषि नवप्रवर्तन, उद्यमशीलता प्रवर्द्धन, शिक्षा र स्वास्थ्य क्षेत्रलाई प्राथमिकतामा राखेर बजेट ल्याइएको बताएका छन्।