हनुमान जयन्तीमा सार्वजनिक बिदा दिन माग

धनुषा/चैत १० गते । हनुमान जयन्तीका अवसरमा मधेश प्रदेशभर सार्वजनिक बिदा दिन माग गरिएको छ । गौ संरक्षण मंच नेपालले मधेशको गृह संचार तथा कानून मन्त्रालयलाई एक ज्ञापन–पत्र बुझाउँदै हनुमान जयन्ती हिन्दु धर्मावलम्बीहरूको महत्वपूर्ण धार्मिक पर्व भएकाले उक्त दिन सार्वजनिक बिदाको माग गरेको हो । भगवान हनुमानको जयन्ती प्रत्येक वर्ष चैत्र शुक्ल पूर्णिमाका दिन मनाइने उल्लेख गरिएको छ । सो अवसरमा देशभर विशेष पूजा–अर्चना, दीप प्रज्वलन तथा शोभायात्रा निकाल्ने परम्परा रहेको पनि जनाइएको छ ।
भक्तजनहरूले विगतदेखि नै उक्त दिन नगर परिक्रमा तथा विभिन्न धार्मिक कार्यक्रमहरू सञ्चालन हुँदै आए पनि प्रदेश सरकारले हालसम्म सार्वजनिक बिदा नदिएकोप्रति असन्तुष्टि समेत व्यक्त गरिएको छ ।
ज्ञापन–पत्रमार्फत गृहमन्त्रीसहित प्रदेश सरकारका सम्बन्धित निकायलाई ध्यानाकर्षण गराउँदै धार्मिक आस्था र परम्पराको सम्मान गर्न आवश्यक कदम चाल्न आग्रह गरिएको छ ।