सिरहा/फागुन २४ गते। प्रतिनिधिसभा निर्वाचनअन्तर्गत सिराहा निर्वाचन क्षेत्र नम्बर–३ बाट राष्ट्रिय स्वतन्त्र पार्टी (रास्वपा)का उम्मेदवार डा. शम्भु यादव विजयी भएका छन्।
आइतबार बिहान करिब १० बजे सार्वजनिक अन्तिम मतपरिणामअनुसार उनले ३२ हजार २४९ मत प्राप्त गर्दै जीत हासिल गरेका हुन्।
उनका निकटतम प्रतिस्पर्धी नेकपा (एमाले)का पूर्वसांसद लिलानाथ श्रेष्ठले १० हजार १५६ मत प्राप्त गर्दै दोस्रो स्थान हासिल गरेका छन्। त्यसैगरी नेपाल कम्युनिस्ट पार्टी (नेकपा)का उम्मेदवार विश्वनाथ साहले ९ हजार ९४२ मत प्राप्त गरेका छन् भने नेपाली कांग्रेसका डा. सुभाषचन्द्र यादवले ९ हजार ८७९ मत प्राप्त गरेका छन्। जनता समाजवादी पार्टी (जसपा) नेपालका उम्मेदवार अशेश्वर यादवले ५ हजार ६७० मत प्राप्त गरेको निर्वाचन अधिकृत राजन श्रीवास्तवले जानकारी दिए।
४० वर्षीय डा. शम्भु यादव सिराहा–३ बाट पहिलो पटक प्रतिनिधिसभा सदस्यमा निर्वाचित भएका हुन्। उनको जन्म सिराहाको पठेरवामा भएको हो। उनले भारतको जयनगर र पटना हुँदै उच्च शिक्षा हासिल गरेका छन्। वि.सं. २०६७ सालमा एमबीबीएस उत्तीर्ण गरेपछि उनले काठमाडौंस्थित बीएन्डभी अस्पतालमा दुई वर्ष र किस्ट कलेजमा एक वर्ष सेवा गरेका थिए।
त्यसपछि उनी आफ्नै गृह जिल्ला सिराहाको मिर्चैया नगरपालिका–७ मा रहेको मिर्चैया हेल्थ पोलिक्लिनिकमार्फत करिब सात वर्षदेखि स्वास्थ्य सेवा प्रदान गर्दै आएका थिए। स्वास्थ्य सेवा र सामाजिक कार्यमार्फत जनतामाझ लोकप्रिय बनेका यादव यस पटकको निर्वाचनमा राजनीतिमा प्रवेश गर्दै प्रतिनिधिसभा सदस्यमा निर्वाचित भएका हुन्।
Discussion about this post