जुली कुमारी महतोद्वारा सहिद दुर्गानन्द झाको सालिकमा माल्यार्पण गरेर चुनावी अभियानको सुरुवात

जनकपुरधाम । प्रतिनिधि सभाको आगामी निर्वाचनका लागि धनुषा क्षेत्र नं.–३ बाट एमाले की उम्मेदवार जुली कुमारी महतोले सहिद दुर्गानन्द झाको सालिकमा माल्यार्पण गर्दै आफ्नो चुनावी अभियानको औपचारिक सुरुवात गरेकी छन्।

सोमबार नगराईन स्थित सहिद दुर्गानन्द झाको सालिकमा माल्यार्पण पश्चात् आयोजित संक्षिप्त कार्यक्रममा बोल्दै उम्मेदवार महतोले सहिद दुर्गानन्द झाको योगदान राष्ट्रका लागि अतुलनीय रहेको बताइन्। सहिद दुर्गानन्द झाको सपना जनता सुखी रहोस र समृद्ध रहोस भन्ने थियो र हाम्रो नीति पनि सुखी नेपाली समृद्ध नेपाल रहको महतोले बताईन । उनले एमालेको नेतृत्वमा रहेको सरकारले नै दुर्गानन्द झालाई शहिद घोषणा गरेको स्मरण गराउँदै, उहाँको नाममा सामुदायिक भवन निर्माण गरेको जानकारी दिइन्।

एमालेको पालामा सहिद दुर्गानन्द झा शहिद घोषणा हुनुभयो। यदि पुनः निर्वाचित भएँ भने भव्य प्रवेशद्वार निर्माण गर्ने घोषणा गर्दछु,” उम्मेदवार महतोले प्रतिबद्धता व्यक्त गरिन्।

आगामी फागुन २१ गते हुने प्रतिनिधि सभाको निर्वाचनका लागि उम्मेदवारी दिएकी महतोले विकास, सुशासन र सामाजिक न्यायलाई आफ्नो चुनावी एजेन्डाको मुख्य आधार बनाएको बताइन्। उनले धनुषा–३ का जनताको अपेक्षा र आवश्यकता अनुसार शिक्षा, स्वास्थ्य, पूर्वाधार विकास तथा रोजगारीका अवसर सिर्जनामा विशेष ध्यान दिने उल्लेख गरिन्।

कार्यक्रममा एमालेका स्थानीय नेता–कार्यकर्ता, समर्थक तथा सर्वसाधारणको उल्लेखनीय उपस्थिति रहेको थियो। माल्यार्पण कार्यक्रमसँगै उम्मेदवार महतोले घरदैलो अभियान, भेटघाट तथा विभिन्न चुनावी कार्यक्रममार्फत जनतामाझ पुग्ने तयारी गरिएको जानकारी दिइन्।

एमाले उम्मेदवार महतोले सहिदहरूको सपना पूरा गर्ने अठोटसहित चुनावी मैदानमा उत्रिएको बताउँदै जनताको साथ र समर्थनका लागि अपिल समेत गरेकी छन्।