माघ ५ गते । मधेश विद्रोहका प्रथम शहीद रमेश महतोको शहादतको स्मरणमा आज मधेशभर विविध कार्यक्रमसहित “बलिदानी दिवस” मनाइँदै छ। हरेक वर्ष माघ ५ गते मनाइने बलिदानी दिवसले मधेश आन्दोलनको ऐतिहासिक बलिदान र संघर्षलाई स्मरण गराउँदै आएको छ।
२०६३ साल माघ ५ गते मधेश बन्दको आह्वान गरिएको दिन सिरहाको लहानमा तत्कालीन माओवादी सेनाको गोली लागेर रमेश महतोले शहादत दिएका थिए। उनको शहादतपछि मधेश विद्रोह थप उग्र बन्दै आन्दोलनले व्यापक रूप लिएको थियो। सोही ऐतिहासिक घटनाको सम्झनामा माघ ५ लाई बलिदानी दिवसका रूपमा मनाउने परम्परा रहँदै आएको छ।
दिवसको अवसरमा आज बिहानै सिरहाको लहानस्थित शहीद स्मारकमा विभिन्न राजनीतिक दलका नेता तथा कार्यकर्ताले माल्यार्पण गर्दै शहीदप्रति श्रद्धाञ्जली अर्पण गरेका छन्। त्यस्तै, जनकपुरधामको शहीद द्वारमा पनि शहीदहरूको सम्झनामा श्रद्धालुहरूको उल्लेखनीय उपस्थिति देखिएको छ।
बलिदानी दिवसको अवसरमा आज मधेश प्रदेशभर सार्वजनिक बिदा दिइएको छ। अघिल्ला सरकारहरूले यस दिन औपचारिक कार्यक्रम आयोजना गर्दै आए पनि, वर्तमान सरकारले गर्ने कार्यक्रमबारे भने अहिलेसम्म स्पष्ट जानकारी सार्वजनिक गरेको छैन।
मधेश विद्रोहका अगुवा दल जनता समाजवादी पार्टी नेपालले बलिदानी दिवस क्षेत्रीय तथा स्थानीय तहमा विभिन्न कार्यक्रम गरी मनाउने जनाएको छ। यसैगरी, जनमत पार्टीले पनि जिल्ला समितिहरूलाई बलिदानी दिवस मनाउन परिपत्र जारी गरेको छ।
मधेश आन्दोलनमा ज्यान आहुति दिएका शहीदहरूको योगदानलाई स्मरण गर्ने बलिदानी दिवसले मधेशको पहिचान, अधिकार र स्वाभिमानको संघर्षलाई नयाँ पुस्तासम्म जीवित राख्ने विश्वास गरिएको छ।
Discussion about this post