लहान नगरपालिकाको सत्रौ नगरसभा समुदघाटन सम्पन्न दाता परिवारलाई सम्मानित

विष्णुदेव सरदार/लहान। सिराहाको लहान नगरपालिकाले १७ औँ नगरसभा “हाम्रो लहान–सुन्दर, समुन्नत र सभ्य लहान” भन्ने मूल नाराका साथ भव्य रूपमा सम्पन्न भएको छ। नगरसभामा नगरपालिकाको समग्र विकास, सुशासन र नागरिकमैत्री सेवा प्रवाहलाई अझ प्रभावकारी बनाउने विषयमा गहन छलफल गरिएको छ।
नगर प्रमुख महेश प्रसाद चौधरीले नगरसभालाई सम्बोधन गर्दै लहानलाई व्यवस्थित, स्वच्छ र आर्थिक रूपमा सबल नगर बनाउने प्रतिबद्धता व्यक्त गर्नुभयो। उहाँले शिक्षा, स्वास्थ्य, पूर्वाधार विकास, सरसफाइ, रोजगारी र सामाजिक समावेशीतालाई प्राथमिकतामा राखेर आगामी योजना कार्यान्वयन गरिने बताउनुभयो।

यो सँगै १७ औं नगरसभाबाट जे. एस. मुरारका बहुमुखी क्याम्पसका जग्गादाता मुरारीलाल मुरारका सम्मानित भएका छन् । त्यसतै अर्का सम्मानित हुनेमा राम कुमार उमा प्रसाद स्मारक अस्पतालका जग्गादाता पवन मुरारकासहित मुरारका परिवार सम्मानित भएको छन्।

नगरसभामा नगर–प्रमुख, वडाध्यक्ष, नगरसभा सदस्य, कर्मचारी, संचारकर्मी, राजनीतिक दलका प्रतिनिधि तथा विभिन्न क्षेत्रका सरोकारवालाहरूको उल्लेखनीय सहभागिता रहेको थियो। कार्यक्रमको खुला सत्र समापन भएसँगै मंगलबार फेरि दिउँसो १:०० बजेको बोलाई हो ।

नगरसभाले नागरिकको आवश्यकता र सुझावलाई आत्मसात् गर्दै दीर्घकालीन विकासको दिशामा अघि बढ्ने साझा संकल्प गरेको छ।
कार्यक्रममा वक्ताहरूले लहान नगरपालिकाले पछिल्लो समय हासिल गरेका विकास उपलब्धिहरूको प्रशंसा गर्दै आगामी दिनमा अझ पारदर्शी र परिणाममुखी कार्यशैली अपनाउन सुझाव दिएका थिए।
१७ औँ नगरसभा सम्पन्न भएसँगै लहान नगरपालिका सुन्दर, समुन्नत र सभ्य लहान निर्माणको यात्रामा थप दृढताका साथ अघि बढ्ने विश्वास व्यक्त गरिएको छ।