काठमाडौँ/पुस २८ गते। नेपाली कांग्रेस विशेष महाधिवेशन पक्षधर समूहको आह्वानमा आइतबारदेखि सुरु भएको विशेष महाधिवेशनको दोस्रो दिन सोमबार बन्दसत्र सुरु भएको छ।
विशेष महाधिवेशन प्रचारप्रसार समितिले सोमबार पत्रकार सम्मेलन गर्दै बन्दसत्रको कार्यक्रम केहीबेर अघि भृकुटीमण्डपस्थित हलमा सुरु भएको जानकारी दिएको हो। बन्दसत्रको अध्यक्षता काठमाडौँ क्षेत्र नं. ५ का कांग्रेस नेता तथा ज्येष्ठ महाधिवेशन प्रतिनिधि ८८ वर्षीय श्यामकुमार खड्काले गर्नुभएको छ।
प्रचारप्रसार समितिका संयोजक सुवास पोखरेलका अनुसार कांग्रेस विशेष महाधिवेशन पक्षधरद्वारा विशेष महाधिवेशनका लागि तयार पारिएको कार्यविधि कानुन व्यवसायी तथा महाधिवेशन प्रतिनिधि नारायणप्रसाद भट्टराईले वाचन गर्ने कार्यक्रम रहेको छ। बन्दसत्रको कार्यक्रम सञ्चालन कांग्रेस कास्कीका सभापति किशोरदत्त बरालले गर्नुहुने छ।
यसैगरी बन्दसत्रमा पार्टीका महामन्त्री गगनकुमार थापा र विश्वप्रकाश शर्माले दुई वटा छुट्टाछुट्टै प्रस्ताव पेस गर्ने कार्यक्रम रहेको छ। महामन्त्रीद्वयले पेस गर्ने प्रस्तावमा राजनीतिक समीक्षा, पार्टीभित्रको विधि, विधान संशोधन तथा संरचनागत सुधारलगायतका विषय समेटिएका छन्।
महामन्त्रीद्वयले प्रस्तुत गरेका प्रस्तावमाथि विभिन्न नौ समूहमा छलफल गरी निष्कर्षमा पुगिने प्रचारप्रसार समितिका संयोजक पोखरेलले जानकारी दिनुभएको छ।
Discussion about this post