जनकपुरधाम/मङ्सिर २९ गते। धनुषामा आर्टिफिसियल इन्टेलिजेन्स (एआई) सम्बन्धी एक दिने तालिम सम्पन्न भएको छ।
आमसञ्चार प्राधिकरण जनकपुरधामको आयोजनामा तथा नेपाल पत्रकार महासंघ धनुषा शाखाको समन्वयमा आइतबार जनकपुरधामस्थित मसाला कटेजमा तालिम सम्पन्न भएको हो।
बदलिँदो सूचना प्रविधिको युगमा पत्रकारिता तथा सञ्चार क्षेत्रलाई प्रविधिमैत्री, प्रभावकारी र विश्वसनीय बनाउने उद्देश्यले तालिम आयोजना गरिएको आमसञ्चार प्राधिकरणले जनाएको छ। तालिममार्फत पत्रकारहरूलाई नयाँ प्रविधिसँग अभ्यस्त गराउँदै समाचार संकलन, सम्पादन र प्रसारण प्रक्रियालाई थप सुदृढ बनाउने लक्ष्य राखिएको थियो।
तालिमको उद्घाटन सत्रमा प्रमुख अतिथिका रूपमा मधेश प्रदेश सरकारका अर्थमन्त्री महेश प्रसाद यादवले एआई प्रविधिले सञ्चार क्षेत्रलाई नयाँ उचाइमा पुर्याउने विश्वास व्यक्त गर्नुभयो। उहाँले एआईको सही र जिम्मेवार प्रयोगले समाचार उत्पादनलाई छिटो, तथ्यपरक र प्रभावकारी बनाउन सकिने बताउनुभयो। साथै, एआई प्रयोग गर्दा नैतिकता, विश्वसनीयता र पत्रकारिताको मूल्यमान्यतालाई प्राथमिकतामा राख्नुपर्नेमा जोड दिनुभयो।
कार्यक्रम आमसञ्चार प्राधिकरण मधेश प्रदेशका अध्यक्ष जितेन्द्र खर्गाको अध्यक्षतामा सम्पन्न भएको थियो। अध्यक्ष खर्गाले एआई प्रविधि पत्रकारिताका लागि अवसर र चुनौती दुवै भएको उल्लेख गर्दै यस्ता तालिमले पत्रकारहरूलाई समयसापेक्ष प्रविधिसँग जोड्न महत्वपूर्ण भूमिका खेल्ने बताउनुभयो।
कार्यक्रममा मिडिया काउन्सिल मधेश प्रदेशका कार्यवाहक अध्यक्ष सुरेश यादव, वरिष्ठ पत्रकार राजेश कर्ण, नेपाल पत्रकार महासंघ धनुषा शाखाका अध्यक्ष पुरन साह, मिडिया काउन्सिल मधेश प्रदेशका पूर्व कार्यवाहक अध्यक्ष कैलाश दासलगायत सञ्चारकर्मी तथा सरोकारवालाहरूको उपस्थिति रहेको थियो।
तालिममा एआईको आधारभूत अवधारणा, समाचार लेखन तथा सम्पादनमा एआईको प्रयोग, तथ्य जाँच (फ्याक्ट–चेकिङ), डिजिटल सुरक्षा लगायतका विषयमा प्रशिक्षण दिइएको आयोजकले जनाएको छ। तालिममा धनुषा जिल्लामा कार्यरत पत्रकारहरूका साथै विभिन्न सञ्चारसम्बद्ध संस्थाका अध्यक्ष तथा प्रतिनिधिहरूको सहभागिता रहेको थियो।
Discussion about this post