मधेश प्रदेशका मुख्यमन्त्री सरोजकुमार यादवले दिए पदबाट राजीनामा

जनकपुरधाम/मङ्सिर १७ गते।मधेश प्रदेशका मुख्यमन्त्री सरोजकुमार यादवले पदबाट राजीनामा दिएका छन् । बुधबार जनकपुरमा बसेको मधेश प्रदेश सभा बैठकमा मुख्यमन्त्री यादवले विश्वासको मत नलिइ राजीनामाको घोषणा गरेका हुन् ।

मुख्यमन्त्री यादवले प्रदेशसभामा मन्तव्य राखिरहदा विपक्षी दलका सांसदहरु बैठक कक्षबाट बाहिरिएका थिए भने एमालेसहित सत्तापक्ष सांसदहरु मात्रै बैठकमा बसेका थिए । मुख्यमन्त्री यादवले एमालेसहित तीन दलका सांसदमात्रै बैठकमा रहेका अवस्थामा कुर्सीसंग विश्वासको मत नमाग्ने भन्दै राजीनामाको घोषणा गरे ।

उनले एमालेले सबै दललाई सहयोग गरेपनि अन्य दलले एमालेलाई साथ नदिएको गुनासो गरे । एमालेलाई आँखा अगाडि विश्वासको मत दिन्न भन्ने हिक्मत नभएर बिपक्षी दलका सांसदले बैठक बहिष्कार गरेको उनले बताए । उनले एमालेलाई असहयोग गर्ने दलहरुलाई जनताले नजिकबाट नियाल्ने दावी गरे । २४ घण्टाभित्र विश्वासको मत लिन सर्बोच्चले परमादेश जारी गरेपछि मुख्यमन्त्री यादवले बुधबार विश्वासको मत लिन खोजेका थिए ।