असोज ४ गते,/जनकपुरधाम। चुरे तथा वनजंगल संरक्षण अभियानले ‘जेडयुथ फर नेचर’ नामक नयाँ संगठन गठन गरेको छ। शनिबार पत्रकार सम्मेलनमार्फत अभियानका संयोजक सुनिल कुमार यादवले संगठन गठनको औपचारिक घोषणा गरेका हुन्।
संयोजक यादवका अनुसार संगठनमा सबै इच्छुक व्यक्तिहरू सदस्य बन्न सक्ने व्यवस्था गरिएको छ भने कार्यक्रम संचालनका लागि आवश्यकताअनुसार संयोजक मात्र तोक्ने प्रावधान रहेको छ।
नवगठित संगठनले प्रदेशमा अन्तरिम सरकार गठन गरी सानो मन्त्रिपरिषद् विस्तार गर्नुपर्ने, प्रत्यक्ष निर्वाचित प्रधानमन्त्री तथा मुख्यमन्त्रीको व्यवस्था मिलाउनुपर्ने र स्थानीय तहको निर्वाचन गैर–दलीय आधारमा गरिनुपर्ने माग राखेको छ।
त्यस्तै, चुरे–भावर क्षेत्रलाई संरक्षित क्षेत्र घोषणा गर्ने, प्राकृतिक स्रोत–साधनको दोहन रोक्ने, चुरे क्षेत्रका नदीमा चरणबद्ध रूपमा चेक ड्याम निर्माण गर्ने तथा वनजंगल संरक्षणका लागि विशेष फोर्स गठन गरी डिभिजन वन कार्यालय अन्तर्गत ल्याउनुपर्ने माग पनि संगठनले अघि सारेको छ।
संगठनले जेनजी पुस्ताले उठाएका जायज मागहरूप्रति समर्थन जनाएको छ। साथै, आफ्ना मागहरू सरकारले पूरा नगरे कडा आन्दोलनमा उत्रन बाध्य हुने चेतावनी संयोजक यादवले दिएका छन्।
Discussion about this post