जनकपुरधाम/असोज २ गते। मधेशको प्रमुख प्रतिपक्षी दल जनता समाजवादी पार्टी (जसपा) नेपाल लगायत दलहरूले सभामुख रामचन्द्र मण्डलसमक्ष प्रदेशसभा बैठकको माग गरेका छन् ।
२४ भदौमा भएको जेन-जी आन्दोलनका क्रममा भएको तोडफोड र आगजनीका कारण प्रदेशसभा भवनमा क्षति पुगेको छ । क्षतिग्रस्त अवस्थामा रहेको प्रदेशसभाको अनुगमनपछि जसपा नेपालसहितका दलका सांसदहरूले प्रदेश सभामुख मण्डललाई भेट गरेर प्रदेशसभा सञ्चालनका लागि अनुरोध गरेका हुन् ।
क्षतिग्रस्त अवस्थामा रहेको प्रदेशसभामा अहिले सरसफाइ र मर्मत सम्भारको कार्य तीव्र गतिमा भइरहेको छ । प्रदेश सभामुख मण्डलका अनुसार प्रदेशसभामा आगजनी र तोडफोडबाट करिब ३० देखि ४० करोड रुपैयाँबराबरको क्षति भएको छ ।
जसपा नेपालका संसदीय दलका नेता तथा पूर्वमुख्यमन्त्री सरोजकुमार यादवले जेन-जीहरूले प्रदेशसभा आगजनी नगरेको दाबी गर्दै संघीयताविरोधी तत्त्वले मुलुकभरि विध्वंस मच्चाएकाले त्यसको जवाफ दिन वर्तमान अवस्थामै सभा सञ्चालन हुनुपर्ने बताए । मधेश प्रदेश संघीयताको जननी रहेको र यो वर्तमान संकटको बेला प्रदेशसभा अवरुद्ध हुँदा राम्रो सन्देश नजाने उनको भनाइ थियो। विहिवार प्रदेशसभाको अवस्था अवलोकन र सभामुखलाई भेटन पुगेका विभिन्न राजनितिक दलका नेताहरु सभामुख रामचन्द्र मण्डललाई यथास्थितीमै भएपनि प्रदेशसभा बोलाउन सुझाव दिएका छन् ।
सभामुख संगै प्रदेशसभाको अवलोकन गरेका उनीहरुले आवश्यक परे आफुहरु निजी स्तरवाटै भएपनि सहयोग गर्न तयार रहेको तर प्राप्त उपलब्धी र संघिय संविधानको रक्षाका लागि एकजुट हुनुपर्ने तर्क गरेका छन् । सो अवसरमा जसपाका राम अशिष यादव, एमालेका हरिनारायण महतो, माओवादी केन्द्रका युवराज भट्टराई, नेकपा एसका रतेश्वर गोइत सहितको उपस्थिती थियो ।
त्यसैगरी, नेकपा एमालेका प्रमुख सचेतक हरिरायण महतोले प्रदेशसभाको बैठक चाँडै नै राख्न सभामुखसँग आग्रह गरे । नेकपा माओवादीका सांसद युवराज भट्टराईले पनि प्रदेशसभा सञ्चालन हुनुपर्ने माग गरे । उनले मुलुकको संक्रमणकालीन अवस्थामा प्रदेशसभा अवरुद्ध हुनु उचित नरहेको बताए ।
यता, प्रदेशसभामुख मण्डलले सत्तापक्षीय दलहरूसँग सरसल्लाह गरेर चाँडै नै प्रदेशसभाको बैठक बोलाउने प्रतिबद्धता जनाएका छन् ।
Discussion about this post