महोत्तरी। महोत्तरी जिल्लाको मटिहानी-७ स्थित धार्मिक, ऐतिहासिक एवं पौराणिक लक्ष्मी सागरमा हुँदै आएको श्री लक्ष्मीनारायण भगवानको साप्ताहिक संध्या आरती आज चार पूरा गरी पाँचौ वर्षमा प्रवेश गरेको अवसरमा श्री लक्ष्मी सागर तथा आरती ब्याबस्थापन समिति मटिहानीले आयोजना गरेको पाँचौ वार्षिक विशेष उत्सव तथा महाआरती कार्यक्रम सु-सम्पन्न भएको छ ।
श्री लक्ष्मी सागर तथा आरती ब्याबस्थापन समिति मटिहानीले आयोजना गरेको पाँचौ वार्षिक विशेष उत्सव तथा महाआरती कार्यक्रमको शुभारम्भ मधेश प्रदेश सभा सदस्य राम अशिष यादव, मटिहानी नगरपालिकाका नगर प्रमुख हरि प्रसाद मंडल, महोत्तरी जिल्लाका प्रमुख जिल्ला अधिकारी श्री नारायण प्रसाद रिसालले संयुक्त रुपमा गर्नुभएको थियो । उक्त सप्ताहिक संध्या आरती बि.सं. २०७८ साल श्रावण ५ गते देखि प्रत्येक हप्ताको बिहीबारको दिन हुँदै आएको छ ।
उक्त वार्षिक उत्सवका विशिष्ट अतिथि मधेश प्रदेश सभा सदस्य राम अशिष यादवले महा लक्ष्मी आरती एउटा शब्द मात्र न भई समग्र मटिहानी नगरपालिकाको समृद्धि विकास, उन्नति र प्रगतिको मन्त्र रहेको भन्दै पोखरी (सागर) मा आरती गर्नु भनेको जलको संरक्षण गर्नु हो भन्ने बिश्वास ब्यक्त गर्नुभयो । त्यसै वार्षिक उत्सव समारोह एवं महा आरती कार्यक्रममा बोल्नु हुँदै मटिहानी नगरपालिकाका नगर प्रमुख श्री हरि प्रसाद मंडलले रामायण कालीन इतिहास बोकेको लक्ष्मी नारायण मठ र लक्ष्मी सागर भएको यस मटिहानी गाँउको अहिले बिश्वभरी चर्चाको बिषय भएको बिचार ब्यक्त गर्दै अहिले तराई लगायत देश भरी पानीको अभावले जनजीवन कष्टकर बन्दै गएको भन्दै आज देखि देश भरी अमृत वर्षा होस भन्ने प्राथना समेत गर्नुभयो । सो अवसरमा आज महा जात्रा समेत निकालिएको थियो उक्त जात्रा मटिहानीको बिभिन्न भागको परिक्रमा गरेको थियो।
Discussion about this post