जनकपुरधाममा २ दिने अचार बनाउने तालिम सम्पन्न

गिरिजानन्द साह/श्रावन ३ गते। अमेरिकी दूतावासको Alumni Small Grant (ASG) 2025 परियोजनाअन्तर्गत नेपाल युनाइटेड स्टेट्स एलुम्नाइ नेटवर्क (NUSAN) मार्फत सञ्चालित अचार बनाउने दुई-दिने तालिम साउन २ र ३ गते जनकपुरस्थित मोनास्टिक कलेजमा सफलतापूर्वक सम्पन्न भएको छ। तालिम SUSI 2015 का एलुम्नाइ आशिष ठाकुरद्वारा सञ्चालित Shaping Youths in Entrepreneurship in Madhesh Province अभियान अन्तर्गत आयोजना गरिएको हो।

यस कार्यक्रमको उद्देश्य स्थानीय उद्यमशीलताको प्रवर्द्धन गर्नुका साथै विशेषगरी युवाहरुलाई परम्परागत खाद्य प्रशोधनमा आधारित व्यवहारिक सीप प्रदान गरी उनीहरूलाई आत्मनिर्भर बनाउनु रहेको थियो। तालिमले अचार बनाउने परम्परागत र व्यवसायिक तरिका, सरसफाइ र सुरक्षाका अभ्यासहरू, प्याकेजिङ विधि तथा बजार व्यवस्थापनसम्बन्धी आधारभूत ज्ञान समेटेको थियो।

तालिममा सहभागीहरूले अत्यन्त सक्रिय सहभागिता जनाएका थिए र नयाँ सीप सिक्ने प्रति गहिरो उत्साह देखाएका थिए। कार्यक्रमले प्राविधिक ज्ञान मात्र नभई स्थानीय बजारमा उद्यमशीलता विस्तारका सम्भावनाहरूको पनि खोजी गर्न प्रेरित गरेको थियो।

तालिमको अन्तिम दिन प्रमाणपत्र वितरण समारोह आयोजना गरिएको थियो, जसमा सबै सहभागीहरूलाई तालिम सफलतापूर्वक सम्पन्न गरेको प्रमाणपत्र प्रदान गरियो। कार्यक्रम सहभागीहरू, समुदायका सदस्यहरू तथा स्थानीय सरोकारवालाहरूबाट अत्यन्त सकारात्मक रूपमा लिएको छ।

कार्यक्रमका संयोजक आशिष ठाकुरले भने, “यो तालिम मधेश प्रदेशमा आत्मनिर्भर र उद्यमशील पुस्ता निर्माणतर्फको महत्वपूर्ण कदम हो। हाम्रो लक्ष्य स्थानीय युवाहरू र महिलाहरूको सीप र आत्मविश्वास वृद्धि गरी दीगो जीविकोपार्जनको अवसर सिर्जना गर्नु हो।”

उक्त परियोजनाले समावेशी विकास, आर्थिक सशक्तिकरण र सीप अभिवृद्धिमा युवाहरूको सक्रिय सहभागिता सुनिश्चित गर्न प्रतिबद्धता जनाएको छ।