गिरिजानन्द साह/सिरहा/बैशाख २६ गते। मधेश प्रदेश सरकारले आर्थिक वर्ष २०८१/०८२ का लागि विनियोजित बजेट अन्तर्गत सञ्चालित बिपन्न सङ्ग मदन भण्डारी आवास कार्यक्रम अन्तर्गत मिर्चैया नगरपालिका वडा नं. ११, गदहवा टोलमा एक नयाँ आवास निर्माण कार्यको शिलान्यास सम्पन्न भएको छ। शिलान्यास कार्यक्रम जनमत पार्टी मधेश प्रदेश संसदीय दलकी सचेतक माननीय भाग्यश्री चौधरीको प्रमुख आतिथ्यतामा सम्पन्न भएको हो।
शिलान्यास कार्यक्रममा मिर्चैया वडा नं. ११ का जनमत पार्टीका विभिन्न नेता, कार्यकर्ता, बुद्धिजीवी तथा सर्वसाधारणको उल्लेखनीय उपस्थिति रहेको थियो। निर्माण हुन लागेको आवास स्थानीय दिलीप माझीको निजि जग्गामा बन्नेछ भन्ने जानकारी साईट इञ्जिनियर रामसुन्दर यादवले दिएका छन्।
सांसद चौधरीले कार्यक्रमलाई सम्बोधन गर्दै दलित, गरिब तथा एकल महिलाहरूको जीवनस्तर सुधार्नका लागि मधेश प्रदेश सरकारले हरेक आर्थिक वर्षमा बजेट छुट्याउँदै आएको बताइन्। “यो कार्यक्रमबाट लक्षित वर्गले सम्मानपूर्वक बाँच्न सक्ने वातावरण प्राप्त गर्नेछन्,” उनले भनिन्।
निर्माण हुन लागेको घरमा दुई सुत्ने कोठा, एक भान्सा कोठा र एक शौचालय रहनेछ। सानो परिवारका लागि यो अत्यन्त उपयुक्त हुने जनमत पार्टी वडा सदस्य पदका उम्मेदवार लक्ष्मण यादवले बताए। उनले यसअघि पनि प्रदेश सरकारद्वारा सोही वडामा दुईवटा घर निर्माण भइसकेको जानकारी गराए।
कार्यक्रममा सहभागी स्थानीय बुद्धिजीवी सुनिल माझीले सांसद भाग्यश्री चौधरीलाई दलित तथा गरिब जनताको सधैं पक्षमा उभिने, सहयोगी नेतृको रूपमा चित्रण गर्दै भने, “उहाँको यस पहलले धेरै विपन्न परिवारको अनुहारमा खुसी ल्याएको छ।”
पूर्वाधार विकास कार्यालयका प्रमुख सी.ई. रामदेव खर्गाले उक्त आवासहरू आगामी असार मसान्तभित्र निर्माण सम्पन्न गरी लाभग्राहीलाई हस्तान्तरण गरिने जानकारी दिएका छन्।
सांसद चौधरीले अन्त्यमा मधेश प्रदेशका दुर्गम गाउँहरू अझै पनि विकासको मुख्य धाराबाट टाढा रहेको उल्लेख गर्दै, जनताको आवश्यकता अनुसार योजना र नीति कार्यान्वयन गर्दै अगाडि बढ्ने प्रतिबद्धता जनाइन्। साथै, उनले दलित महिलाहरूलाई राजनीतिमा सक्रिय सहभागिता जनाउन समेत आग्रह गरिन्।
Discussion about this post