गिरिजानन्द साह/चैत ५ गते। जीवन विकास लघुवित्त वित्तीय संस्थाको शाखा कार्यालय चोहर्वा सिरहाले आफ्नो वित्तीय संस्थामा आवद्ध केन्द्र प्रमुखहरुको उपस्थितिमा केन्द्र प्रमुख गोष्ठी तथा वित्तीय साक्षरता सम्बन्धी कार्यक्रम भव्यताका साथ सम्पन्न गरेको छ।
कार्यक्रम संस्थाको आईएडी विभागीय प्रमुख विजय कुमार मण्डलको सभापतित्वमा सम्पन्न भएको थियो भने गोलबजार नगरपालिकाका प्रमुख श्याम कुमार श्रेष्ठले कार्यक्रमको उद्घाटन गरेका थिए। कार्यक्रममा संस्थागत जानकारी तथा उद्देश्यबारे जीवन विकास लघुवित्त वित्तीय संस्था लिमिटेडका उद्यमशीलता विकास विभागीय प्रमुख मनोज कुमार शर्माले जानकारी गराएका थिए।
कार्यक्रमलाई दुई सत्रमा विभाजन गरिएको थियो— उद्घाटन सत्र र प्रशिक्षण सत्र। उद्घाटन सत्रमा प्रमुख अतिथि मेयर श्याम कुमार श्रेष्ठले जीवन विकास लघुवित्त वित्तीय संस्थाले स्थानीय तहमा आर्थिक विकासमा पुर्याएको योगदानबारे चर्चा गरे। उनले ग्रामीण भेगका नागरिकहरूलाई वित्तीय सेवासँग जोडेर उनीहरूको आर्थिक सशक्तिकरण गर्न संस्थाले खेलेको भूमिकालाई विशेष प्रशंसा गरे।
प्रशिक्षण सत्रमा विभागीय प्रमुख मनोज कुमार शर्माले सहभागीहरूलाई वित्तीय साक्षरतासम्बन्धी विभिन्न महत्वपूर्ण विषयमा प्रशिक्षण प्रदान गरे। उनले ग्राहक सदस्यहरूको चेतनामा वृद्धि, सामूहिक भावनाको विकास, नेतृत्व क्षमताको विस्तार, बचत गर्ने बानीको विकास, ग्राहक सदस्यहरूलाई उद्यमशील बनाउन आवश्यक उपाय, डिजिटल बैंकिङ सेवा, बहुबैंकिङबाट बच्ने उपाय जस्ता विषयमा जानकारी दिए।
कार्यक्रमका क्रममा जीवन विकास लघुवित्त वित्तीय संस्थाको शाखा कार्यालय चोहर्वाका सदस्यहरू मध्ये उत्कृष्ट बचतकर्ता, उत्कृष्ट ऋणी, उत्कृष्ट उद्यमी तथा शाखा अन्तर्गत रहेका केन्द्रहरू मध्ये पहिलो, दोस्रो र तेस्रो स्थान प्राप्त गर्ने केन्द्रहरूलाई सम्मान गरिएको थियो। आईएडी विभागीय प्रमुख विजय कुमार मण्डलले ग्रामीण समुदायको जीवनस्तर उकास्न लघुवित्त संस्थाले खेलेको महत्त्वपूर्ण भूमिकाबारे चर्चा गर्दै कर्जाको सही सदुपयोग गरी व्यावसायलाई सफल बनाउन ग्राहक सदस्यहरूलाई सुझाव दिए। साथै, उनले संस्थाले प्रविधिमैत्री र पारदर्शी कारोबारलाई प्राथमिकता दिँदै अगाडि बढ्ने प्रतिबद्धता व्यक्त गरे।
उक्त कार्यक्रममा १५० भन्दा बढी सहभागी सदस्यहरूको उपस्थिति रहेको थियो। प्रमुख अतिथि गोलबजार नगरपालिकाका मेयर श्याम कुमार श्रेष्ठ, विशिष्ट अतिथि नगर उपप्रमुख मानती साह, अतिथिहरूमा वडा न.-११ का अध्यक्ष साहेब अनबर, वडा न.-७ का हरी शरण ठाकुर, उद्यमशीलता विकास विभागीय प्रमुख मनोज कुमार शर्मा, प्रदेश प्रमुख राम नारायण यादव, पत्रकार गिरिजानन्द साह, वडा न.-८ का देव नारायण महतो, समाजसेवी गौरीशंकर सिंह, चोहर्वा शाखाको केन्द्र न.-६३ का प्रमुख धानो महरा तथा शाखा कार्यालय चोहर्वा सिरहाका कर्मचारीहरू समेत कार्यक्रममा उपस्थित थिए। कार्यक्रमले सहभागीहरूलाई वित्तीय साक्षरता वृद्धि गर्न तथा आर्थिक रूपले सक्षम बन्न उत्प्रेरित गर्ने महत्त्वपूर्ण भूमिका खेलेको छ।
Discussion about this post