सिरहाको भगवानपुर–२ मा अतिरिक्त क्रियाकलाप : कुलत मुक्त समाज र सरकारी सेवा लक्षित अभियान

महेश सिंह/लहान/माघ १२ गते। भगवानपुर गाउँपालिका-२, नहरा रिगौलस्थित लक्ष्मी नारायण कौशल्या जनता माध्यमिक विद्यालयका पूर्वविद्यार्थीहरूले विद्यालयका हालका विद्यार्थीहरूलाई सरकारी सेवातर्फ आकर्षित गर्न विशेष अतिरिक्त क्रियाकलापको आयोजना गर्दै आएका छन्। कुलत तथा नकारात्मक गतिविधिबाट टाढा राख्दै विद्यार्थीलाई उज्ज्वल भविष्यतर्फ उन्मुख गराउने उद्देश्यसहित प्रत्येक वर्ष विभिन्न प्रतियोगितात्मक कार्यक्रमहरू सञ्चालन हुँदै आएका छन्।

विद्यालयका शिक्षक महेश कुमार यादवका अनुसार पूर्वविद्यार्थीहरूले व्यक्तिगत रूपमा आर्थिक स्रोत संकलन गरी कार्यक्रम आयोजना गर्ने गरेका छन्। यस वर्षको कार्यक्रम विद्यालयका पूर्वविद्यार्थी सरोज कुमार यादवको विशेष पहल र नेतृत्वमा सम्पन्न भएको हो। माघ ११ गते भगवानपुर गाउँपालिका- २ मा अवस्थित लक्ष्मी नारायण कौशल्या जनता मा.वि. को प्राङ्गणमा सम्पन्न उक्त कार्यक्रममा विभिन्न खेलकुद प्रतियोगिताहरूको आयोजना गरियो। म्युजिकल चेयर प्रतियोगितामा छात्रातर्फ लक्ष्मी नारायण कौशल्या जनता मा.वि. बहराले प्रथम स्थान हासिल गर्दा हनुमान प्रसाद जनता मा.वि. इनर्वा द्वितीय स्थानमा रह्यो। छात्रतर्फ राउन्ड मुभिङ रेसमा बालसुन्दरी मा.वि. भगवानपुर प्रथम स्थान प्राप्त गर्न सफल भयो।

डोरी तान प्रतियोगितामा छात्रतर्फ लक्ष्मी नारायण कौशल्या जनता मा.वि. नहरा तथा छात्रातर्फ बालसुन्दरी मा.वि. भगवानपुरले पहिलो स्थान हात पारेका छन्। हाजिरी जवाफ प्रतियोगितामा लक्ष्मी नारायण कौशल्या जनता मा.वि. नहराले उत्कृष्ट प्रदर्शन गर्दै उपाधि जितेको थियो। यस वर्षको ‘च्याम्पियन्स अफ द इयर’ को उपाधि लक्ष्मी नारायण कौशल्या जनता मा.वि. नहराले हात पार्न सफल भएको छ। प्रतियोगितामा विद्यालयका विभिन्न तहका विद्यार्थीहरूले उत्साहजनक सहभागिता जनाएका थिए।

विद्यालयका प्रधानाध्यापक जीवछ प्रसाद यादवको अध्यक्षतामा सम्पन्न कार्यक्रममा स्थानीय जनप्रतिनिधि,शिक्षक,अभिभावक तथा विद्यार्थीहरूको उल्लेखनीय उपस्थिति रहेको थियो। प्रधानाध्यापक यादवले कार्यक्रमको प्रभावकारिता उल्लेख गर्दै पूर्वविद्यार्थीहरूप्रति आभार प्रकट गरेका थिए। कार्यक्रममा पूर्वविद्यार्थी बिनोद कुमार यादवले समुदायका युवाहरूले समाज सुधार र शिक्षित समाज निर्माणमा अग्रणी भूमिका निर्वाह गरिरहेको बताए। स्थानीय मनोज कुमार यादवका अनुसार यसखाले कार्यक्रमले समाजमा नयाँ उदाहरण प्रस्तुत गरेको छ। पूर्वविद्यार्थी अशोक कुमार यादवले कार्यक्रमलाई प्रेरणादायी र उदाहरणीय बताउँदै यसले विद्यार्थीहरूलाई सरकारी सेवातर्फ प्रेरित गर्ने महत्वपूर्ण अवसर प्रदान गरेको उल्लेख गरे।

कार्यक्रमको संयोजक तथा सरोज कुमार यादवको नेतृत्व विशेष पहलमा अनुशासित, मर्यादित तथा निस्पक्ष रूपमा कार्यक्रम सम्पन्न भएको जानकारी दिएका छन्। उनले सहभागी सम्पूर्ण विद्यार्थीहरूलाई बधाई ज्ञापन गर्दै आगामी दिनमा अझ प्रभावकारी कार्यक्रम गर्ने प्रतिबद्धता व्यक्त गरे। विद्यालय पूर्वविद्यार्थी मञ्चको तर्फबाट सम्पूर्ण सहभागीहरूलाई धन्यवाद दिइएको छ। कार्यक्रमले विद्यार्थीको समग्र विकासमा महत्त्वपूर्ण योगदान पुर्याउने विश्वास लिइएको छ।