पुस २३ गते। नेपालका दलित मुसहर समुदायका सयौँ मजदुरलाई भारतको श्रीनगरमा आठ महिना बन्धक बनाएर काम लगाई ज्यालाविना घर फर्काइएको छ ।
सिरहाको गोलबजार नगरपालिका वडा नम्बर २ र ३ का १२० जना मुसहर समुदायका मजदुरलाई भारतको श्रीनगर पु¥याएर बन्धक बनाएर बाध्यात्मक अवस्थामा काम गराइएको छ । उनीहरुको मोबाइलसमेत खोसेर घर परिवारसँग सम्पर्कविहीन बनाइएको थियो । खाना र ज्याला माग्दा उल्टै कुटपिट र याताना दिने गरेको ती मुसहर मजदुरको आरोप छ ।
८ महिनापछि प्रति व्यक्ति दुई हजारको दरले गाडी भाडा दिएर घर फर्काइएको उनीहरु बताउँछन् । गत कार्तिकमा घर आइपुगेका मुसहर मजदुरहरु हाडछाला मात्र लिएर रित्तै हात घर आएका थिए । घर फर्केका अधिकांश मजदुरहरु बिरामी परेर थला परेको अवस्थामा आइपुगेका थिए । दुई महिनाको उपचारपछि बल्ल स्वस्थ्य हुने क्रम जारी छ ।
अहिले मुसहर मजदुरहरुले न्याय माग्दै वडा कार्यालय, नगरपालिका र इलाका प्रहरी कार्यालय गोलबजारमा निवेदन दिएका छन् । मुसहर मजदुरले गाउँमा फर्केर सामाजिक छलफल राखेर हरिचन सदासँग ज्याला पनि मागेका थिए । उनले १५ हजार रुपैयाँ महिनाका दरले ज्याला उपलब्ध गराउने समाजमा प्रतिवद्धता जनाए । तर, तोकिएको भाकामा ज्याला नदिएपछि पीडित मजदुरहरु अहिले ज्याला मागसहित मानव बेचविखनमा उजुरी दिएका छन् ।
त्यसपछि हरिचन सदा र उनका सम्धी भने फरार छन् । २०८० चैत महिनातर्फ सिरहाको गोलबजार नगरपालिका– ३ का हरिचन सदा र नातामा उनको सम्धी पर्ने अर्का एक जनाले अपरिचित व्यक्ति गरी थप दुईजना व्यक्तिहरु लिएर गाउँमा आएका थिए । दिल्ली धमला र अर्का एक नाम नखुलेको भारतीय ठेकेदार थिए ।
चार जनाले गोलबजार वडा नं. ३ स्थित भांगारी र वडा नं. २ स्थित नवटोली गाउँका मुसहर समुदायलाई जम्मा गरेर बैठक गरेका थिए । दैनिक ज्याला दैनिक ११ सय रुपैयाँ उपलब्ध गराउने लोभ दिएका थिए । भवन निर्माण कार्यका लागि आकर्षक ज्याला दिने भनेपछि दुई गाउँका एक सय २० जना दलित मुसहर समुदायका मजदुरहरु भारतको श्रीनगर गएका थिए ।
पीडित विनोदकुमार सदाले रक्सी र मासु पनि खुवाएको सम्झे । चार हजार रुपैयाँ गरी जनही पेश्की पनि दिएका थिए । गाउँकै हरिचन सदा र उनका सम्धी जमानीमा बसे । गाउँकै हरिचनले जनही मासिक ३३ हजार रुपैयाँ ज्याला महिना पुग्नासाथ दिने भनेर ग्यारेण्टी लिएपछि श्रीनगर जान तयार भएको बताए । लौकहा नाकाबाट रेल चढाएर उनीहरुलाई श्रीनगर पु¥याइएको थियो ।
Discussion about this post