धनुषाको जटही स्थित सिक्सलेन सडक छेउमा मृत फेला परेका युवकको पहिचान खुल्यो

धनुषा/बैशाख १८ गते। धनुषाको जटही स्थित सिक्सलेन सडक छेउमा सोमबार बिहान मृत फेला परेका युवकको पहिचान खुलेको छ ।

मृतक युवक भारतको विहार मधुवनी जिल्लाको बासोपट्टी वडा नम्बर १ का ३२ वर्षीय मोहम्मद नवाउदिन रहेका जिल्ला प्रहरी कार्यालय धनुषाले जनाएको छ । धनुषाको नगराइन नगरपालिका २ जटही स्थित आँपको बगैंचामा सोमबार बिहान उनको शव फेला परेको थियो ।

उनको अत्यधिक मदिरा सेवनको कारण उनको मृत्यु हुन सक्ने प्रहरीको आशंका रहेको छ । धनुषाका प्रहरी प्रवक्ता डिएसपी रञ्जन अवाका अनुसार हिजो साँझ मृतकको पहिचान भएको हो । शव पोस्टमार्टमका लागि प्रादेशिक अस्पताल जनकपुरमा राखिएको र घटना विषयमा थप अनुसन्धान भइरहेको जिल्ला प्रहरी कार्यालय धनुषाले जनाएको छ ।