अत्याधिक गर्मीका कारण वीरगञ्जका सामूदायिक विद्यालयहरु थप ३ दिन बन्द,संस्थागत विद्यालय खुल्ने

वीरगञ्ज/असार २ गते । गर्मी कम नभएपछि वीरगञ्जका सामूदायिक विद्यालयहरु थप ३ दिन बन्द हुने भएको छ ।

वीरगञ्ज महानगरपालिकाले एक सूचना जारी गर्दै तापक्रम घट्नुको सट्टा झन् बढ्दै गएपछि थप ३ दिनका लागि विदा दिने निर्णय गरेको जनाएको छ ।

यसअघि बढ्दो गर्मीका कारण बालबालिकाहरुको स्वास्थ्यमा प्रतिकुल प्रभाव परेको भन्दै महानगरले गत जेष्ठ १९ गतेदेखि २६ गतेसम्म र त्यसपछि जेष्ठ २८ देखि असार १ गतेसम्मका लागि बालविकास देखि कक्षा १२ सम्मको पठनपाठन हुने सबै सामुदायिक र संस्थागत विद्यालयहरु बन्द गरेको थियो ।

तर गर्मी कम नभएपछि वर्षे विदामा कट्टा हुने गरि थप ३ दिन अर्थात अषाढ ३ गतेदेखि ५ गतेसम्म सामुदायिक विधालय बन्द गर्ने निर्णय गरेको महानगरपालिकाका शैक्षिक प्रशासन महाशाखाका अधिकृत हरि राउतले जानकारी दिए । उनले सामुदायिक विधालय बन्द रहे पनि संस्थागत विद्यालय भने आइतबारदेखि संचालनमा आउने बताए ।

यस्तै आगामी अषाढ ५ गते मंगलबार गहवामाई (माईस्थान मन्दिर) रथयात्रा रहेकाले एक दिनका लागि संस्थागत विद्यालय पनि बन्द रहने अधिकृत राउतले बताए ।

पर्सा, बारा लगायत मध्यतराईका जिल्लाहरुमा पछिल्लो तीन सातायता गर्मी अत्याधिक बढिरहेको छ । यसक्षेत्रमा तापक्रम बढेर अधिकतम ४५ डिग्रि सेल्सियससम्म पुगेको छ । शुक्रबार वीरगञ्ज र यसआसपासको क्षेत्रमा अधिकतम तापक्रम ४५ डिग्रि सेल्सियस मापन गरिएको थियो ।