सिरहाको शोभापुर गाउँमा एक मुस्लिम महिलाको शंकास्पद मृत्यु

सौरभ यादव,सिरहा।सिरहामा एक मुस्लिम महिलाको शंकास्पद मृत्यु भएको छ । सिरहाको लहान नगरपालिका- १८ शोभापुर गाउँमा २५ वर्षीया इसरत खातुनको शंकास्पद मृत्यु भएको हो । घटनामा अनुसन्धानका लागि प्रहरीले एक व्यक्तिलाई नियन्त्रणमा लिएको छ ।

मृतकका श्रीमान् दिल मोहम्मद वैदेशिक रोजगारमा कतार गएका छन् । उनी दुई छोरा-छोरीसहित घरमा बस्दै थिइन् । स्थानीयका अनुसार उनलाई सोमबार राति आफन्ती पर्ने सासू–ससुराले कुटपिट गरेका थिए । कुटपिटबाट घाइते भएकी खातुनलाई स्थानीय औषधि पसलमा उपचार गराएका थिए । तर, उनको बिहीबार मृत्यु भएको छ ।

स्थानीयका अनुसार मृत्युपछि केही व्यक्तिले खातुनलाई एम्बुलेन्समा राखी उपचार गराउन भन्दै अस्पताल लान खोजेपछि स्थानीयले प्रहरीलाई खबर गरेका थिए । प्रहरीका अनुसार अस्पताल पुग्दा महिलाको मृत्यु भइसकेको थियो । शवलाई पोष्टमार्टमका लागि लहानस्थित राउ स्मारक अस्पतालमा राखिएको छ ।

इलाका प्रहरी कार्यालय लहानका डीएसपी शरत थापा क्षेत्रीले घटनाका विषयमा जाहेरी परेको बताए । त्यहीअनुसार अनुसन्धान बढाएको उनले बताए । ‘महिलालाई कुटपिट गर्ने आरोपित एक जनालाई नियन्त्रणमा लिएका छौँ । थप अनुसन्धान भइरहेको छ,’ डीएसपी थापाले भने, ‘अस्पताल पुर्‍याउने व्यक्तिले विष सेवन गरेको भने जानकारी गराएको छ । पोष्टमार्टमपछि सबै कुरा खुल्नेछ ।’

शिलापत्र बाट