सिरहाको लहानमा फेरि एक सुनचाँदी व्यवसायीको घरमा लुटपाट,सर्वसाधारण त्रासमा

सिरहा/चैत ३० गते।सिरहाको लहानमा फेरि एक सुनचाँदी व्यवसायीको घरमा लुटपाट भएको छ । लहान-२३ मा सुनचाँदी व्यवसायी प्रदीप विश्वकर्मा हत्या र लुटपाट घटनाको ३६ घण्टा पनि नबित्दै लहान-७ मा फेरि लुटपाट भएको हो ।

लहान-७ का सुनचाँदी व्यसायी राजेश सारडाको घरमा साँझ ६:३० बजे लुटपाट भएको प्रहरीले जनाएको छ । हतियारधारी ६/७ जनाको डाँका समूह राजेश सारडाको घरमा प्रवेश गरी उनका उनका छोरा गौरव सारडाको कन्चटमा पेस्तोल तेर्साई पिता भगिरथ सारडा र उनका श्रीमती मंजुदेवी सारडा लाई धारिलो हतियारले टाउको र शरीरमा प्रहार गर्दै दुई वडा दराजको लकर फोडेर करोडौको सुनचाँदी लुटेर लगेको भगिरथ सारडाले बताएका छ्न।साथै लुटेराहरूको समूहले सारडाको बा १० च ९३०२ नम्बरको कार पनि चोरेर लगेका छन् ।

लुटेराहरूले सारडाको जीप समेत लिएर भागेका छन्। घरमा पार्किङ गरी राखिएको जिपको साँचो बलजफ्ती लिएर हतियारधारी लुटेरा समूह भागेको भगीरथले बताए। घरभित्र तीन जना हतियारधारी समूह प्रवेश गरेको उनले बताए। इलाका प्रहरी कार्यालय लहानका डीएसपी तपनकुमार दाहालका अनुसार शनिबार रातीको घटनाको प्रकृतिसँग यो घटना मिल्दोजुल्दो देखिएको बताए । शनिबार राती लहान नगरपालिका–२३ स्थित सुनचाँदी व्यापारी प्रदीपकुमार मिझारको हत्या भएको थियो। 

‘त्यही समूहले यो घटना घटाएको हो कि भन्ने शंका छ। हामी हतियारधारी समूह र उनले लिएर भागेको सारडाको जिप खोज्दैछौं’ उनले भने, ‘सूचना पछ्याउँदै छौं, सफलता हात परेको छैन।’

लहानमा पछिल्लो एक सातामा तीनवटा लुटपाट तथा डकैतीका घटना घटेका छन् । बढ्दो लुटपाट तथा डकैतीका घटनाले यहाँका सर्वसाधारण त्रासमा छन् ।