गिरिजानन्द साह/जनकपुरधाम, असोज २३ गते। जनकपुरधाम जेसीजको जेसीज सप्ताह २०२६ अन्तर्गत स्कुल लेभल ओरेट्री कन्टेस्ट (वक्तृत्वकला प्रतियोगिता) सम्पन्न भएको छ। युवाहरूको नेतृत्व क्षमता, व्यक्तित्व विकास तथा वक्तृत्वकला अभिवृद्धि गर्ने उद्देश्यले प्रतियोगिता आयोजना गरिएको हो।
जनकपुरधाम जेसीजको आयोजनामा सोमबारदेखि सुरु भएको जेसीज सप्ताह अन्तर्गत शुक्रबार स्कुल लेभल ओरेट्री कन्टेस्ट सञ्चालन गरिएको हो। प्रतियोगिताको उद्घाटन जनकपुरधाम जेसीजका पूर्वअध्यक्ष लक्ष्मीनारायण साहले गरेका थिए। कार्यक्रममा पूर्व अध्यक्षद्वय तुलसी पंजियार र सुधीर पंजियार अतिथिका रूपमा उपस्थित थिए।
प्रतियोगितामा विभिन्न विद्यालयका कक्षा ९ र १० मा अध्ययनरत विद्यार्थी सहभागी भएका थिए। सहभागी विद्यार्थीहरूले ‘युवा र एकता’ विषयमा पाँच मिनेटको समयभित्र आ–आफ्नो धारणा तथा प्रस्तुति दिएका थिए।
कार्यक्रमका संयोजक जेसी ओम प्रकाश साहका अनुसार विद्यार्थीहरूको प्रस्तुतिको मूल्याङ्कन निर्णायकहरूले तोकिएको मापदण्डका आधारमा गरेका छन्। मूल्याङ्कनका आधारमा प्रथम, द्वितीय र तृतीय स्थान छनोट गरिएको छ। प्रतियोगिताको नतिजा शनिबार आयोजना हुने जेसीज सप्ताह समापन कार्यक्रममा सार्वजनिक गरी विजेताहरूलाई पुरस्कार प्रदान गरिनेछ।
युवाहरूको नेतृत्व विकास तथा सामाजिक उत्तरदायित्व अभिवृद्धिमा सक्रिय जनकपुरधाम जेसीजले हरेक वर्ष विभिन्न रचनात्मक कार्यक्रममार्फत विद्यार्थी तथा युवाहरूको क्षमता विकासमा जोड दिँदै आएको छ। जेसीज सप्ताह २०२६ अन्तर्गत पनि विभिन्न कार्यक्रम सञ्चालन भइरहेका छन्।
जनकपुरधाम जेसीज वर्ष २०२६ का अध्यक्ष जेसी भवेश झाले जेसीज सप्ताहको समापन कार्यक्रम शनिबार आयोजना गरिने जानकारी दिए।
आजको कार्यक्रममा जनकपुरधाम जेसीजका पदाधिकारी तथा सदस्यहरूका साथै विभिन्न विद्यालयका शिक्षक र विद्यार्थीहरूको उपस्थिति रहेको थियो।
Discussion about this post