फ्लोरिडा/साउन १९ गते। एक युवा इन्जिनियरिङ शिक्षक विश्वकै सबैभन्दा कान्छा पुरुष प्राध्यापक बन्दै कीर्तिमान कायम गर्न सफल भएका छन्।
पिपुल्स पत्रिकाका अनुसार १९ वर्ष पुग्नु अघि नै कलेजमा शिक्षण पद सम्हालेपछि उनले यो उपाधि प्राप्त गरेका हुन्।
गिनिज वर्ल्ड रेकर्ड्सका अनुसार नाथन थोमस १८ वर्ष ३४६ दिनको उमेरमा मियामी डेड कलेजमा इन्जिनियरिङ विषयको शिक्षण पद स्वीकार गरेर विश्वकै सबैभन्दा कान्छा पुरुष प्राध्यापक बनेका हुन्। यसअघि यो कीर्तिमान ३०६ वर्षसम्म कोलिन म्याकलौरिनको नाममा थियो, जो १९ वर्षको उमेरमा प्राध्यापक बनेका थिए।
थोमस विश्वकै सबैभन्दा कान्छी महिला प्राध्यापकको कीर्तिमान कायम गरेकी आलिया साबुरभन्दा पनि १६ दिन कान्छा छन् । साबुर सन् २००८ मा १८ वर्ष ३६२ दिनको उमेरमा प्राध्यापक बनेकी थिइन्।
समाचार अनुसार अनुसार थोमसले अगस्ट २०२३ मा मियामी डेड कलेजमा पढाउन सुरु गरेका थिए। उनले आफूसँगै उमेरका विद्यार्थीहरूलाई पढाए। पत्रकारसाग कुरा गर्दै थोमसले भने कि कक्षाकोठामा पुगे पछि सबैजना एउटै उद्देश्यका लागि अर्थात् सिक्नका लागि त्यहाँ हुन्छन् र त्यसमा उमेरले खासै अर्थ राख्दैन।
उनले थपे कि उनी केवल आफ्नो काम राम्रोसँग गर्न र आफूले सकेसम्म विद्यार्थीहरूलाई मद्दत गर्नमा ध्यान केन्द्रित गर्छन् । साथै, यदि कोही प्रयास गर्न इच्छुक छ भने उनीहरूका लागि त्यही कुरा सबैभन्दा महत्त्वपूर्ण हुन्छ।
एक योग्य शिक्षकका रूपमा, थोमस आफ्नो कक्षामा जटिल कम्प्युटिङ र प्रोग्रामिङ अवधारणाहरू सिकाउने जिम्मेवारी सम्हाल्छन्। थोमस जम्मा १० वर्षको उमेरमा मियामी डेड कलेजमा भर्ना भएका थिए र १४ वर्षको उमेरमा फ्लोरिडा इन्टरनेसनल युनिभर्सिटीमा स्थानान्तरण भएका थिए। त्यसपछिका चार वर्षमा, उनले इलेक्ट्रिकल इन्जिनियरिङमा अनर्ससहित स्नातक र स्नातकोत्तर दुवै तहको अध्ययन पूरा गरे।
इन्जिनियरहरूको परिवारबाट आएका थोमसले बताए कि हुर्कँदै गर्दा गणित सधैं उनलाई सहज लाग्थ्यो। उनले बताए कि उनकी आमामा कठिन कुराहरूलाई पनि सरल बनाउने विशेष शैली थियो र उनलाई लाग्छ कि त्यसले उनमा गहिरो प्रभाव पारेको थियो, जुन कुरा उनले त्यतिबेला सायद पूर्ण रूपमा महसुस गरेका थिएनन्।
पढाउने कामको सन्दर्भमा थोमसले भने कि उनलाई सबैभन्दा बढी मन पर्ने कुरा भनेको कुनै अवधारणा, जुन केही क्षण अघिसम्म असम्भव जस्तो लाग्थ्यो, अचानक विद्यार्थीका लागि स्पष्ट र बोधगम्य बन्नु हो।
Discussion about this post