धनुषा/असार २१ गते। एम्नेस्टी इन्टरनेसनल युथ–५७ जनकपुरधामको ३५औँ साधारण सभा शनिबार जनकपुरधामस्थित होटल फलसममा सम्पन्न भएको छ। सभाले आगामी दुई वर्षे कार्यकालका लागि मनिष झा श्री ओमलाई सर्वसम्मत रूपमा अध्यक्ष (संयोजक) चयन गरेको छ।
एम्नेस्टी इन्टरनेसनल नेपालका पूर्व अध्यक्ष शम्भु ठाकुरको प्रमुख आतिथ्य तथा निवर्तमान संयोजक कमल साहको अध्यक्षतामा सम्पन्न साधारण सभाले संस्थाको आर्थिक तथा सांगठनिक प्रतिवेदन सर्वसम्मत रूपमा पारित गरेको थियो।
कार्यक्रमलाई सम्बोधन गर्दै प्रमुख अतिथि ठाकुरले मानवअधिकार संरक्षण, सामाजिक न्याय तथा लोकतान्त्रिक मूल्य–मान्यताको सुदृढीकरणमा युवाको भूमिका अत्यन्त महत्वपूर्ण रहेको बताए। उनले सचेत, जिम्मेवार र सक्रिय युवाहरूको सहभागिताबाट मात्रै समाजमा सकारात्मक परिवर्तन सम्भव हुने उल्लेख गर्दै मानवअधिकारको पक्षमा निरन्तर क्रियाशील रहन आग्रह गरे।
अध्यक्ष कमल साहले मानवअधिकारका विषयमा युवाको सहभागिता र नेतृत्वलाई थप सशक्त बनाउन संस्था निरन्तर सक्रिय रहने बताए। उनले समानता, न्याय र मानव मर्यादाको प्रवर्द्धनका लागि युवाहरू संगठित भएर अघि बढ्नुपर्ने आवश्यकता औँल्याए।
नवनिर्वाचित कार्यसमितिको उपाध्यक्ष (सह–संयोजक) मा उर्मिला यादव, सचिवमा अम्बिका प्रसाद कर्ण, कोषाध्यक्षमा मुकेश ठाकुर तथा सदस्यहरूमा फूलकुमारी साह, कैलाश प्रसाद, उदयचन्द्र यादव, संजय प्रसाद साह र शिवशंकर मिश्र सर्वसम्मत चयन भएका छन्।
त्यसैगरी, कमल साह, डा. विनयकुमार झा र रमेश कुमार साह सल्लाहकार समितिमा चयन भएका छन् भने कमल साह र उर्मिला यादवलाई प्रदेश प्रतिनिधिका रूपमा मनोनयन गरिएको छ।
कार्यक्रममा संस्थाका सदस्य, मानवअधिकारकर्मी तथा युवाहरूको उल्लेखनीय सहभागिता रहेको थियो।
एम्नेस्टी इन्टरनेसनल विश्वका १५० भन्दा बढी देशमा सक्रिय अन्तर्राष्ट्रिय मानवअधिकार संस्था हो। संस्थासँग विश्वभर एक करोडभन्दा बढी सदस्य आबद्ध रहेका छन्। यसले मानवअधिकार संरक्षण, प्रवर्द्धन तथा जनचेतना अभिवृद्धिका क्षेत्रमा निरन्तर काम गर्दै आएको छ।
Discussion about this post