अक्षयकुमारले बेचे मुम्बईका दुई अपारमेन्ट, लिए १९ करोड

मुम्बई/असार १९ गते। अक्षय कुमार अहिले सफलताको शिखरमा छन्। उनको अघिल्लो चलचित्र ‘भूत बंगला’ हिट भएको थियो भने हालै प्रदर्शनमा आएको ‘वेलकम टु द जंगल’ ले पनि बक्स अफिसमा उत्कृष्ट व्यापार गरिरहेको छ।

यसैबीच, यी अभिनेताले मुम्बईमा रहेका आफ्ना दुईवटा विलासी अपार्टमेन्टहरू बिक्री गरी करोडौं रुपैयाँ नाफा कमाएका छन्। प्राप्त विवरणअनुसार, अक्षयले मुम्बईको मुलुन्डमा अवस्थित ती दुई विलासी अपार्टमेन्टहरू १२.३८ करोड भारतीय रुपैयाँमा बिक्री गरेका हुन्, जुन नेपाली लगभग १९ करोड बढी रकम बराबर हो ।

सीआरई म्याट्रिक्सले प्राप्त गरेको दर्तासम्बन्धी कागजातका अनुसार उनले ती दुवै अपार्टमेन्ट सन् २०१७ मा ९ करोड भारतीय रुपैयाँमा खरिद गरेका थिए।

यी दुवै अपार्टमेन्टहरू मुलुन्ड वेस्टको एलबीएस रोडमा अवस्थित ओबेरोय रियालिटीको प्रिमियम आवासीय परियोजना ओबेरोय एनिग्माको माथिल्लो तल्लामा रहेका छन्। कागजातहरूका अनुसार प्रत्येक अपार्टमेन्टको कार्पेट क्षेत्रफल १,८८६ वर्ग फिट छ र यी दुई अपार्टमेन्टसँगै कार पार्किङका लागि ६ वटा छुट्टै स्थानहरू उपलब्ध छन्।

सम्पत्ति दर्तासम्बन्धी कागजातहरूले सनी होम केयर प्राइभेट लिमिटेडले अक्षय कुमारका ती दुईवटा अपार्टमेन्ट खरिद गरेको देखिएको छ । प्रत्येक अपार्टमेन्ट ६ करोड १९ लाख रुपैयाँमा बिक्री गरिएको थियो, जसले गर्दा कुल कारोबार मूल्य १२ करोड ३८ लाख भारतीय रुपैयाँ पुग्यो। खरिदकर्ताले प्रत्येक कारोबारका लागि ३७ लाख १४ हजार रुपैयाँका दरले ‘स्ट्याम्प ड्युटी’ अर्थात राजस्व भुक्तानी गरेका छन, जुन कुल ७४ लाख २८ हजार रुपैयाँ हुन आउँछ।

अक्षय कुमारले अक्टोबर २०१७ मा यी दुवै अपार्टमेन्ट खरिद गरेका थिए। त्यस समयमा प्रत्येक अपार्टमेन्टको मूल्य करिब ४.४९ करोड रुपैयाँ थियो। दर्ता गरिएको कारोबार मूल्यका आधारमा हेर्दा अक्षयले प्रत्येक अपार्टमेन्ट खरिद मूल्यभन्दा करिब १.७० करोड रुपैयाँ बढीमा बिक्री गरे, यसले झन्डै नौ वर्षको अवधिमा मूल्यमा करिब ३८ प्रतिशतको वृद्धि भएको देखाउँछ।

आफ्ना चलचित्रहरूका अलावा अक्षय कुमार घरजग्गामा गरेको लगानीका कारण पनि चर्चामा छन्। २ जुन २०२६ मा उनले मुम्बईको बोरिभली ईस्टस्थित ओबेरोई स्काई सिटीमा रहेका आफ्ना थप दुईवटा अपार्टमेन्टहरू बिक्री गरेका छन्। उनले ती अपार्टमेन्टहरू ७.१ करोड रुपैयाँमा बिक्री गरेका हुन्।

कागजातहरूका अनुसार अक्षयले तीमध्ये एउटा अपार्टमेन्ट ३ करोड रुपैयाँमा र अर्को ६७.५५ लाख रुपैयाँमा नोभेम्बर २०१७ मा खरिद गरेका थिए।