सापु रोगको जोखिम बढ्दै, जनकपुरधाममै शल्यक्रिया सेवा सञ्चालन गर्नुपर्ने माग

धनुषा/जेठ २६ गते। सापु रोगको ५०औँ वार्षिकोत्सवको अवसरमा स्वास्थ्य निर्देशनालय, मधेस प्रदेशले निगरानी सुदृढीकरण, जनचेतना तथा अभिमुखीकरण कार्यक्रम आयोजना गरेको छ । सापु रोगका कारण बढ्दो स्वास्थ्य जोखिमलाई ध्यानमा राख्दै सचेतना र निगरानीलाई प्रभावकारी बनाउने उद्देश्यले कार्यक्रम सञ्चालन गरिएको हो ।

कार्यक्रममा जनकपुरधाम उपमहानगरपालिकाका नगरप्रमुख मनोजकुमार साहले सापु रोगका बिरामीलाई सहज उपचार सेवा उपलब्ध गराउन जनकपुरधाममै शल्यक्रिया सेवा सञ्चालन गर्नुपर्ने आवश्यकता औँल्याए । उनले हाल सिरहाको लहानमा मात्रै शल्यक्रिया सेवा उपलब्ध रहेकाले जनकपुरधाममा पनि यस्तो सेवा विस्तार गर्न आवश्यक रहेको बताए । साथै, जनकपुरधामस्थित जानकी आँखा अस्पताललाई थप व्यवस्थित र सुदृढ बनाउन सम्बन्धित निकायले ध्यान दिनुपर्ने धारणा राखे ।

स्वास्थ्य निर्देशनालयका निर्देशक सरोजचन्द्र न्यौपानेले वातावरणीय परिवर्तनका कारण सापु रोगको जोखिम बढ्दै गएको बताए । उनका अनुसार बागमती प्रदेशमा रोगको प्रकोप बढ्दो क्रममा रहेकाले मधेस प्रदेश पनि जोखिमको दायरामा पर्न सक्ने अवस्था देखिएको छ । उनले समयमै जनचेतना अभिवृद्धि, निगरानी र रोकथामका उपायलाई प्रभावकारी बनाउन आवश्यक रहेको उल्लेख गरे । न्यौपानेले सापु रोगको नियन्त्रण तथा व्यवस्थापनका लागि मधेस प्रदेश सरकारले आवश्यक नीति तथा कार्यक्रम तर्जुमा गरी कार्यान्वयनतर्फ अघि बढ्ने जानकारी दिए ।

कार्यक्रममा स्वास्थ्यकर्मी, सरोकारवाला निकायका प्रतिनिधि तथा विभिन्न क्षेत्रका व्यक्तिहरूको सहभागिता रहेको थियो । नेपालमा सापु रोग पहिलोपटक विसं २०३२ सालमा पोखरास्थित एक विद्यालयमा पहिचान गरिएको थियो । यो रोग विशेषगरी बालबालिकामा बढी देखिने भए पनि ३८ दिनका शिशुदेखि ८० वर्षसम्मका व्यक्तिमा समेत संक्रमण देखिने गरेको चिकित्सकहरू बताउँछन् ।