जेठ १५ गते । माइती नेपालको सूचनाका आधारमा भारतको कोलकातास्थित रेड लाइट क्षेत्रमा यौन शोषणमा परेका तीन जना नेपाली महिला तथा नाबालिकाको सफल उद्धार गरिएको छ।
२४ मे २०२६ मा कोलकाता प्रहरीको एन्टी ह्युमन ट्राफिकिङ युनिट तथा बर्टोला प्रहरी स्टेशनद्वारा सञ्चालन गरिएको संयुक्त रेड अभियानमार्फत उनीहरूको उद्धार गरिएको माइती नेपालले जनाएको छ। उद्धार कार्यमा द्रुत कारबाही तथा प्रभावकारी समन्वय गरेको भन्दै माइती नेपालले कोलकाता प्रहरीप्रति हार्दिक आभार व्यक्त गरेको छ।
उद्धार गरिएका महिला तथा बालिकाहरूको सुरक्षित स्वदेश फिर्ताका लागि माइती नेपालले नेपाल सरकारका सम्बन्धित निकायहरूसँग आवश्यक समन्वय र सहकार्य गरिरहेको जनाएको छ।
माइती नेपालका अनुसार यो उद्धार नुवाकोटको घ्याङफेदी क्षेत्रबाट कोलकातासम्म बालिका तथा युवतीहरूको निरन्तर भइरहेको बेचबिखनको प्रवृत्तिलाई नियन्त्रण गर्ने उद्देश्यसहित सञ्चालन गरिएको अभियानको परिणाम हो। उक्त अभियान माइती नेपालको अनुसन्धान तथा यसअघि उद्धार भई संरक्षणमा रहेका बालिका तथा युवतीहरूबाट प्राप्त सूचनाका आधारमा सञ्चालन गरिएको थियो।
मानव बेचबिखनमा संलग्न रहेको आरोपमा शोभा तामाङ पक्राउ परेकी छन्। उनी यसअघि पनि मानव बेचबिखनकै मुद्दामा दुई वर्षको कारावास सजाय भोगिसकेको खुलेको छ।
माइती नेपालको अनुसन्धानले नुवाकोट क्षेत्रमा पारिवारिक सम्बन्धको दुरुपयोग गर्दै बालिकाहरूलाई फसाउने र ओसारपसार गर्ने सक्रिय सञ्जाल अझै कायम रहेको संकेत गरेको जनाएको छ। यसले पुनः शोषणको जोखिम तथा बालिका र युवतीहरूको सुरक्षाप्रति गम्भीर चिन्ता बढाएको उल्लेख गरिएको छ।
संस्थाका अनुसार शोभा तामाङ बाहेक पनि उक्त बेचबिखन सञ्जालमा अन्य धेरै व्यक्तिहरू संलग्न रहेको आशंका गरिएको छ। यस सम्बन्धमा जानकारी भए माइती नेपाललाई सूचना उपलब्ध गराउन समेत अनुरोध गरिएको छ।
उद्धार अभियानका क्रममा कोठी सञ्चालकहरूले माइती नेपालको उद्धार सुपरभाइजर तथा उद्धारमा खटिएका प्रहरी अधिकारीहरूमाथि शारीरिक आक्रमण गरेका थिए। उक्त घटनामा केही व्यक्ति घाइते भएको जनाइएको छ।
यस्ता चुनौतीका बाबजुद पनि प्रत्येक बालिका तथा महिलाले मर्यादा, सुरक्षा र आशासहितको जीवन जिउन पाउने अधिकार सुनिश्चित गर्न माइती नेपाल रोकथाम, उद्धार, पुनःस्थापना तथा पैरवी कार्यमा निरन्तर प्रतिबद्ध रहने जनाएको छ।
Discussion about this post