धनुषा/जेठ ८ गते । जनकपुरधाममा जिल्ला स्तरीय राष्ट्रपति रनिङ शिल्ड प्रतियोगिता सुरु भएको छ । जिल्ला खेलकुद विकास समिति धनुषाको आयोजनामा शुरु भएको प्रतियोगिता शनिबारसम्म चल्नेछ ।
शुक्रबार शुरु भएको प्रतियोगितामा एथलेटिक्स, भलिवल, कराते, तेक्वान्दो, कबड्डी सहितका खेलहरु हुनेछन् । जिल्ला स्तरीय राष्ट्रपति रनिङ शिल्ड प्रतियोगिता उदघाटन जिल्ला खेलकुद विकास समितिका अध्यक्ष कुशकुमार यादवले गरेका छ्न।
एथलेटिक्स अन्तर्गत १०० मिटर, २०० मिटर, ४०० मिटर, ८०० मिटर, १५०० मिटर र ३००० मिटर दौड प्रतियोगिता, हाइ जम्प, लंग जम्प, ट्रिपल जम्प, रिले खेल, जेबलिङ्ग थ्रो सहितका प्रतियोगिता आयोजना गरिएको छ ।
जिल्ला स्तरीय राष्ट्रपति रनिङ शिल्ड प्रतियोगितामा ५ पालिकाका ५ सय बढी खेलाडीहरुको सहभागिता रहेको छ । धनुषाको हँसपुर नगरपालिका, क्षिरेश्वनाथ नगरपालिका, मिथिला नगरपालिका, मिथिला विहारी नगरपालिका र जनकनन्दनी गाउँपालिकाका खेलाडीहरु सहभागी भएका छन् ।
युवाहरु कुलतमा फसिरहेको समयमा खेलले युवामा अनुशासनको विकास गर्ने भएकाले यस्ता प्रतियोगिताहरु महत्वपूर्ण हुने गरेको प्रतियोगिताको उदघाटन कार्यक्रममा प्रमुख अतिथिको आसनबाट जिल्ला खेलकुद विकास समितिका अध्यक्ष कुशकुमार यादवले बताए । उनले यस प्रकारका खेलहरु वर्षमा एक पटक मात्र नभई निरन्तर हुनु आवश्यक रहेको बताए । यसकालागि पालिका स्तरबाटै पहल हुनुपर्ने तर्फ उनले जोड दिए ।
उदघाटन कार्यक्रममा जिल्ला खेलकुद विकास समितिका कार्यालय प्रमुख अरविन्द यादव, वरिष्ठ प्रशिक्षक अरुणलाल कर्ण सहितको उपस्थिति रहेको थियो ।
Discussion about this post