जनकपुरधाम/पुस ९ गते। मधेशी सहिद प्रतिष्ठानले सहिदहरूको बलिदानबाट स्थापना भएको मधेश प्रदेश सरकारले प्रतिष्ठानको मर्म र उद्देश्यअनुसार कामकाज नगरेको आरोप लगाउँदै प्रदेश सरकारको गम्भीर ध्यानाकर्षण गराएको छ।
प्रतिष्ठानका पदाधिकारीहरूले शुक्रबार जनकपुरधाममा पत्रकार सम्मेलनको आयोजना गर्दै विगतमा प्रतिष्ठानका लागि पर्याप्त कार्यक्रम तथा बजेट विनियोजन हुँदै आए पनि चालु आर्थिक वर्षमा विनियोजित थोरै बजेटसमेत कार्यान्वयन हुन नसकेको गुनासो गरेका छन्।
पत्रकार सम्मेलनमा प्रतिष्ठानका सदस्य तथा सहिद परिवारका सदस्य शुभम् यादवले विगतका वर्षहरूमा प्रतिष्ठानका लागि १०–१२ करोड रुपैयाँ बजेट विनियोजन हुने गरेको भए पनि यस वर्ष केवल २ करोड रुपैयाँ मात्र छुट्याइएको र सो बजेटअनुसारका कार्यक्रमसमेत सञ्चालन गर्न नदिइएको बताउनुभयो। उहाँले सङ्घीयताको आन्दोलनका क्रममा शहादत दिएका सहिद परिवारको समग्र हितका लागि गठन भएको प्रतिष्ठानलाई राज्यले पङ्गु बनाउने प्रयास गरेको आरोप लगाउनुभयो।
यादवका अनुसार प्रतिष्ठानमा कार्यरत कर्मचारी तथा सदस्यहरूले हालसम्म कुनै पनि प्रकारको सेवा सुविधा पाउन सकेका छैनन्। सहिदको नाममा भाषण गर्ने तर सहिद परिवार तथा घाइतेहरूको वास्तविक अवस्था के छ भन्नेबारे राज्यले कुनै चासो नदेखाएको उहाँको भनाइ छ।
प्रतिष्ठानले ‘एक सहिद परिवार, एक रोजगार’ कार्यक्रम कार्यान्वयन नगरिएको, सहिद परिवारका आश्रित सन्तान तथा छोराछोरीको शिक्षा–दीक्षामा समेत सरकारले आवश्यक ध्यान नदिएको आरोप लगाएको छ।
पत्रकार सम्मेलनमा बोल्दै सहिद परिवारहरूले शनिबार अर्थात् ११ गतेसम्म आफ्ना मागहरू सम्बोधन नभए आइतबारदेखि आन्दोलनमा उत्रने चेतावनी दिएका छन्। मधेशी सहिद प्रतिष्ठानसँग हाल करिब १ हजार १ सयभन्दा बढी सहिद परिवार आबद्ध रहेको जानकारी पनि पत्रकार सम्मेलनमार्फत दिइएको छ।
Discussion about this post