जनकपुरधाम/कार्तिक २० गते। एशोसिएशन अफ प्राइभेट हेल्थ इन्स्टिच्युसन अफ नेपाल (APHIN) ले स्वास्थ्य सेवाको संवेदनशीलता बुझ्दै आन्दोलित स्वास्थ्यकर्मीहरूलाई काममा फर्किन आग्रह गरेको छ। संघले बिहीबार विज्ञप्ति जारी गर्दै सङ्घीय सरकारले गठन गरेको पारिश्रमिक अध्ययन समितिको प्रतिवेदन नआएसम्म संयमता अपनाउन अपिल गरेको हो।
हाल मधेस प्रदेशका विभिन्न निजी अस्पतालका स्वास्थ्यकर्मीहरू पारिश्रमिकमा असमानता र न्यून तलबको विरोध गर्दै आन्दोलनमा छन्। उनीहरूले निजी र सरकारी स्वास्थ्यकर्मीबीच समान मूल्याङ्कन र पारिश्रमिकमा समानता कायम गर्न माग गर्दै आएका छन्।
सङ्घीय स्वास्थ्य तथा जनसङ्ख्या मन्त्रालयले कार्तिक १६ गते प्रा. डा. श्रीकृष्ण श्रेष्ठको संयोजकत्वमा अस्पताल वर्गीकरण तथा पारिश्रमिक कार्य योजना तयार गर्ने समिति गठन गरेको थियो। सो समितिलाई एक महिनाभित्र स्वास्थ्यकर्मीको पारिश्रमिक सम्बन्धी नीति तथा कार्य योजना तयार गर्ने जिम्मेवारी दिइएको छ।
जनकपुरधाममा आयोजित पत्रकार सम्मेलनमा एशोसिएशनका अध्यक्ष डा. एस. के. सिंहले आन्दोलनका कारण जनस्वास्थ्य सेवा प्रभावित भएको बताए। उनले भने, “निजी अस्पताल सञ्चालन र गुणस्तरीय स्वास्थ्य सेवा जनतासम्म पुर्याउन स्वास्थ्यकर्मीहरूको भूमिका अमूल्य छ। उनीहरूले सम्मानजनक पारिश्रमिक पाउनुपर्ने हक स्वाभाविक हो, तर आन्दोलनका कारण सेवा अवरुद्ध हुँदा सर्वसाधारण नागरिक प्रभावित भइरहेका छन्, जुन हाम्रो साझा उद्देश्य विपरीत हो।”
डा. सिंहका अनुसार सङ्गठनले अस्पतालहरूको आर्थिक क्षमता, सेवाग्राहीको भुक्तानी क्षमता र स्वास्थ्यकर्मीको श्रम मूल्यबीच सन्तुलन कायम गर्दै व्यवहारिक समाधान खोज्न सरकार र सम्बन्धित पक्षलाई सुझाव दिएको छ।
Discussion about this post