गिरिजानन्द साह/जनकपुरधाम/साउन १६ गते । जलवायु परिवर्तनका कारण मधेश प्रदेशमा उत्पन्न जलस्रोत संकटबारे बिहीवार जनकपुरधाममा अन्तरक्रिया कार्यक्रम सम्पन्न भएको छ। मधेश प्रदेश सरकार अन्तर्गत गृह, सञ्चार तथा कानुन मन्त्रालयको आयोजनामा सम्पन्न उक्त कार्यक्रममा सरोकारवालाबीच संकटको कारण, त्यसका प्रभाव र सम्भावित समाधानका उपायबारे विस्तृत छलफल गरिएको हो।
कार्यक्रममा बोल्दै मधेश प्रदेशका गृह, सञ्चार तथा कानुन मन्त्री राजकुमार लेखीले जलवायु परिवर्तन अब कुनै काल्पनिक अवधारणा नभई आजको कठोर यथार्थ बनेको उल्लेख गरे। भूमिगत पानीको सतह क्रमशः घट्दै जानु, अनियमित वर्षा तथा तापक्रमको अत्यधिक वृद्धि जस्ता चुनौतीले जनजीवन प्रत्यक्ष प्रभावित गरिरहेको मन्त्री लेखीको भनाइ थियो।
“अबका दिनमा जलस्रोत व्यवस्थापनको दीर्घकालीन योजना बनाउने र त्यसको प्रभावकारी कार्यान्वयनमा प्रदेश सरकार गम्भीर रूपमा जुट्छ,” मन्त्री लेखीले भने। उनले जलवायु संकटको असरबाट सर्वसाधारणलाई जोगाउन स्थानीय निकाय, प्राविधिक विशेषज्ञ तथा समुदायसँग सहकार्यमा आधारित दीर्घकालीन नीति आवश्यक रहेको धारणा राखे।
कार्यक्रममा जल, सिँचाइ, कृषि, स्वास्थ्य तथा वातावरण क्षेत्रका विज्ञ, स्थानीय तहका जनप्रतिनिधि, पत्रकार, नागरिक समाजका प्रतिनिधिहरूको उपस्थिति रहेको थियो। सहभागीहरूले मधेश प्रदेशमा पानीको अभावले कृषिमा परेको असर, खानेपानी संकट तथा भविष्यका सम्भावित जोखिमबारे तथ्यांकसहित प्रस्तुति दिएका थिए।
Discussion about this post