मैथिली फिल्म ‘कलकतियावाली’ साउन १० गतेदेखि प्रदर्शनमा आउने

साउन ७ गते। बहुप्रतीक्षित मैथिली फिल्म ‘कलकतियावाली’ आगामी साउन १० गतेदेखि सिनेमा हलमा प्रदर्शनमा आउने भएको छ। नायिका अनिशा सदा झाको असामयिक निधनका कारण केही समय रोकिएको फिल्म अब उनको श्रद्धाञ्जलीस्वरूप रिलिज गर्न लागिएको हो।

मंगलवार आयोजित पत्रकार सम्मेलनमा फिल्मका निर्देशक तथा कथाकार **अरुण कुमार यादव ‘अरुण विजय’**ले फिल्मको पहिलो चरणको रिलिज कल्याणपुरबाट सुरु हुने जानकारी दिएका छन्। उनका अनुसार, दोस्रो चरणमा जनकपुरधाम र त्यसपछि भारतको मिथिला क्षेत्रका विभिन्न हलहरूमा फिल्म प्रदर्शन गरिनेछ।

निर्देशक विजयले भावुक हुँदै भने, “अंशाको सपना थियो फिल्म हलमा आफनो अभिनय हेर्ने । त्यो सपना पूरा नभए पनि हामी उनको सम्झनामा पहिले तय गरिएका स्थानहरूमा फिल्म रिलिज गर्दैछौं। मैथिली समाजलाई यो फिल्म हेरेर अंशालाई श्रद्धाञ्जली दिन आग्रह गर्दछु।”

सामाजिक कथावस्तुमा आधारित यो फिल्ममा मैथिली समाजका विविध मुद्दा, भावना र संघर्षहरू चित्रण गरिएको बताइएको छ। फिल्मका प्रमुख पात्रहरूमा अभिनाश झा (कलकतियाबाली), श्याम कुमार राम (अठिवा), अनिशा सदा झा (अन्शा), इशिका भुजेल, रामनारायण ठाकुर, र मनिषा सदा (मंशा) रहेका छन्।

निर्देशकका अनुसार, फिल्ममा समावेश गरिएको एक गीत युट्युबमा सार्वजनिक भएसँगै लोकप्रियता कमाइसकेको छ। फिल्मको निर्माण, निर्देशन र कथालेखनको सम्पूर्ण जिम्मा अरुण कुमार यादव ‘अरुण विजय’ले नै सम्हालेका छन्।

फिल्म हेर्न नपाउने दर्शकका लागि केही समयपछि ‘कलकतियावाली’ युट्युबमा पनि सार्वजनिक गरिने जानकारी दिइएको छ। अंशा सदा झाको निधनलाई मैथिली फिल्म क्षेत्रका लागि ठूलो क्षति मानिँदै आएको छ। यसै सन्दर्भमा कलाकार, दर्शक तथा शुभेच्छुकहरूबाट फिल्मलाई श्रद्धाञ्जलीको रूपमा समर्थन मिल्ने अपेक्षा गरिएको छ।