ब्लड फर नेपाल सातौँ वर्षमा प्रवेश, २५ हजार बढीलाई रगत व्यवस्थापन

गिरिजानन्द साह/श्रावण ४ गते। रगत अभावका समस्या न्यूनीकरण गर्ने उद्देश्यले स्थापित स्वयंसेवी संस्था ब्लड फर नेपाल स्थापना भएको सात वर्ष पूरा गरी सातौँ वार्षिकोत्सव मनाइरहेको छ।

धनुषा निवासी सरोज कुमार महतोद्वारा स्थापना भएको यस संस्थाले हालसम्म २५ हजार ३८२ जनालाई रगत व्यवस्थापन गरिसकेको जनाएको छ। रगत नपाइरहेका बिरामीहरूलाई रक्त सञ्चार केन्द्र र रक्तदाता बीच समन्वय गर्दै देशव्यापी रुपमा संस्था सक्रिय रहेको छ।

संस्थाका सचिव भवानी साहका अनुसार ४ हजार ३९३ जना रक्तदातालाई परिचालन गरी ६ हजार ९८२ पिन्ट रगत संकलन गरि विभिन्न रक्त सञ्चार केन्द्रहरूमा हस्तान्तरण गरिएको छ। उनले थपे, “२४० वटा रगतका कुरा अर्थात् रक्तदान जनचेतना कार्यक्रम, १ हजार ४२५ जनाको रगत समूह परीक्षण, १२८ जनाको मधुमेह परीक्षण, ८ हजार १०० जनालाई मास्क वितरण र ३ हजार ५०० जनालाई जीवनजल वितरण गरिएको छ।”

कोषाध्यक्ष अर्चना झा बताउँछिन्, “आर्थिक चुनौतीहरू अझै ठूलो छन्, तथापि हामी विभिन्न संघसंस्थासँग सहकार्य गर्दै आएका छौं र आगामी दिनमा अझ सशक्त साझेदारीको अपेक्षा छ।”

संस्थाका उपाध्यक्ष सन्तोष यादवले युवाहरुलाई संस्थासँग जोड्न कलेज प्रतिनिधि, संस्थाहरूलाई एसोसिएट मेम्बर तथा आजीवन सदस्य बनाउने अभियान सुरु गरिएको जानकारी दिए।

कार्यकारी केन्द्रिय सदस्य मनिष भाद्रले रक्तदान कार्यक्रम, रक्तसेवा हटलाइन, रगत समूह परीक्षण र स्वास्थ्य शिविरजस्ता कार्यक्रमहरू निरन्तर सञ्चालनमा रहेको जानकारी गराए।

केन्द्रिय सदस्य अजय यादवका अनुसार ब्लड फर नेपाल देशका सबै प्रदेशमा प्रतिनिधिसहित सक्रिय छ, गण्डकी प्रदेशमा भने सहकार्यका माध्यमबाट कार्यक्रम गरिँदै आएको छ।

सदस्य रामविनय यादवले सामाजिक सञ्जालले संस्थाको अभियानलाई देश–विदेशमा फैलाउन ठूलो सहयोग पुगेको बताए।

संस्थाका वरिष्ठ सल्लाहकार क्षितिज कार्की भन्छन्, “देशमै सक्रिय रक्तसेवा संस्था ब्लड फर नेपालसँग जोडिन पाउँदा गर्व लाग्दछ।”

संस्थापक सरोज महतोले सात वर्षको यात्रामा साथ दिने सम्पूर्ण रक्तदाता, सदस्य, सहकार्य संस्था र शुभेच्छुकप्रति आभार व्यक्त गर्दै भने, “देशभर रक्त अभाव कम गर्न अझ धेरै काम गर्नुछ, र यो सहकार्यविना सम्भव छैन।”

उनले सबैलाई अपिल गर्दै भने, “आउनुहोस्, सँगै मिलेर ‘रगतका कुरा’ देशभर फैलाऔं र रगत अभाव हटाऔं।”