मधेस सरकारले दुई दर्जनभन्दा बढी नारासहित आगामी आवका लागि ल्यायो नीति तथा कार्यक्रम

जेठ २३ गते । मधेस सरकारले दुई दर्जन भन्दा बढी नारासहित आगामी आर्थिक वर्ष २०८२।८३ को नीति तथा कार्यक्रम प्रस्तुत गरेको छ । शुक्रबार बसेको मधेस प्रदेशसभा बैठकमा प्रदेश प्रमुख सुमित्रा सुवेदी भण्डारीले प्रस्तुत गरेको नीति तथा कार्यक्रममा विभिन्न नारासहित अभियान सञ्चालन गर्ने उल्लेख छ ।
उत्पादन मधेशमा, विस्तार देशमा’, ‘मधेशको शान, स्थानीय मखान’, ‘आँपको बगैंचा, मधेशको समृद्धि’, ‘खेत–खेतमा पानी, घर–घरमा खाद्यान्न सहित आम्दानी’, ‘श्रमिकलाई सवारी, घर घरमा रोजगारी’, ‘पूर्ण सुरक्षित मातृत्व प्रदेश, पूर्ण खोप प्रदेश, कुपोषणमुक्त प्रदेश’, ‘उद्यमशील महिला, समृद्ध मधेश’, ‘खेली मधेश, जीती मधेश’, ‘घुमौं मधेश बुझौं मधेश’, ‘चुरे जोगाउ, मधेश बचाउ’, मुख्यमन्त्री हरियाली प्रवद्र्धन अभियान’, ‘हरित शहर स्वच्छ शहर’, ‘विपद् व्यवस्थापनमा पूर्व तयारी, सुरक्षित भई निम्त्याउ खुसियाली’ लगायतको नारासहित विभिन्न अभियान सञ्चालन गर्ने नीति तथा कार्यक्रममा उल्लेख छ ।

वर्तमान सरकारले मखान खेतीको विकास तथा विस्तार गरी प्रशोधन, प्याकेजिंग, लेवलिंग तथा ब्राण्डिंग लगायतका कार्यहरुमा प्रोत्साहन गरिने नीति लिएको छ । ‘हर हाथमे सीप, हर घरमे रोजगार, सीपयुक्त युवा, समृद्ध मधेशके आधार’ अभियानलाई आत्मसात गर्दै पहिलो चरणमा एक लाख रोजगारीको अवधारणालाई अगाडि बढाइने जनाएको छ । स्वास्थ्य, शिक्षाका कार्यक्रमहरुलाई प्राथमिकताका साथ कार्यान्वयमा ल्याइने, मातृ शिशु स्वास्थ्य प्रवद्र्धन गर्ने, महिलालाई उद्यमशीलता तिर उन्मुख गराउन प्राथमिकता दिइने लगायतको नीति लिएको छ ।

‘बेटी पढाउ, बेटी बचाउ’ अभियान बन्द गरेको मधेस सरकारले महिला हिंसा तथा भेदभावको अन्त्य गरी महिला सशक्तीकरण गर्न ‘बेटी जिन्दावाद’ अभियान सञ्चालन गर्ने नीति तथा कार्यक्रममा उल्लेख छ । यस्तै, ‘मुख्यमन्त्री बेटी पढाऊ, बेटी बचाऊ’ कार्यक्रमलाई अनुगमन मूल्यांकन गरी प्रभावकारिताको साथ निरन्तरता दिइने जनाएको छ । मधेशमा पर्यटन प्रवद्र्धनका लागि ‘घुमौं मधेश, बुझौं मधेश’ नारालाई आत्मसात गर्दै ‘मधेश भ्रमण वर्ष २०८३’ अभियानलाई सञ्चालनमा ल्याइने नीति लिएको छ ।

यस्तै, गुनासो, सुझाव तथा समस्या समाधानका लागि ‘हेल्लो मुख्यमन्त्री’ अभियानलाई प्राथमिकताका साथ लागु गर्ने नीति लिएको हो । ‘समृद्ध मधेश, समृद्ध राष्ट्रको आधार’ मार्गदर्शक सिद्धान्त अनुसार सामाजिक न्याय, आर्थिक समावेशिता र पूर्वाधार विकास लगायतका क्षेत्रहरुमा दिगो विकास लक्ष्ति कार्यक्रमहरु सञ्चालन गर्ने नीति लिइएको प्रदेश प्रमुख भण्डारीले भनिन् । मधेस सरकारले कृषकहरुलाई कृषि उत्पादनमा वृद्धि गर्न सम्झौता भई निर्माणाधीन।अधुरो अवस्थामा रहेको शीत भण्डार निर्माण सम्पन्न गर्न तथा कृषि मिटर र सोलार पम्पमा अनुदान उपलब्ध गराउने नीति लिने, भूमिगत सिँचाई क्षेत्र विस्तार गरी कृषि उत्पादन तथा उत्पादकत्व बढाउन कृषि विद्युतीकरण कार्यक्रमलाई निरन्तरता दिइने नीति लिएको छ ।

सरकारले ‘विज्ञान र प्रविधिको विकास, समृद्धिको आधार’ लाई मूर्तरुप दिन प्रदेश गौरवको आयोजनाको रुपमा साइन्स एण्ड टेक्नोलोजी इनोभेशन क्लस्टर अन्तर्गत स्पेश एण्ड कम्युनिकेशन सेन्टर, स्टार्टअप तथा इनोवेशन सेन्टर र ईन्कुवेसन सेन्टर स्थापना गरी सञ्चालनमा ल्याइने जनाएको छ । प्रदेश सरकारले उद्योग, व्यवसायी तथा किसान लक्षित ऋण कार्डको व्यवस्था गरी वित्तीय सुधार कार्यक्रम सञ्चालन गर्ने नीति लिएको छ । प्रदेशको गौरवका आयोजनाको रुपमा ‘मधेश लगानी सम्मेलन’, ‘ट्राभेल समिट’ तथा ‘डायस्पोरा समिछट’ को आयोजना गर्ने नीति लिएको छ ।