गिरिजानन्द साह/जनकपुरधाम/जेठ २३ गते। महिला कानुन विकास मञ्च (FWLD) को आयोजना तथा सशक्त महिला, समृद्ध नेपाल परियोजना अन्तर्गत मधेस प्रदेशका माननीय प्रदेशसभा सदस्यहरूबीच लैङ्गिक उत्तरदायी बजेट सम्बन्धी अन्तरक्रियात्मक छलफल कार्यक्रम सम्पन्न भएको छ।
कार्यक्रमका प्रमुख अतिथि मधेस प्रदेशसभा सभामुख माननीय रामचन्द्र मण्डल रहनुभएको थियो। विशेष अतिथिका रूपमा उपसभामुख माननीय बबिता राउत ईशरको उपस्थिति रहेको थियो। कार्यक्रमका अन्य विशिष्ट अतिथिमा अर्थ तथा योजना समितिका सभापति माननीय अनिता कुमारी साह र महिला, बालबालिका तथा सामाजिक न्याय समितिका सभापति माननीय रुपा कुमारी यादव रहनुभएको थियो
मन्तव्यको क्रममा सभामुख मण्डलले लैङ्गिक समावेशीतालाई समावेशी विकासको मेरुदण्डका रूपमा व्याख्या गर्दै नीति निर्माणदेखि कार्यान्वयनसम्म लैङ्गिक दृष्टिकोण समावेश गर्नु आजको आवश्यकता रहेको बताउनुभयो। उहाँले बजेट निर्माण प्रक्रियामा महिलालगायत सबै वर्गको समान सहभागिता सुनिश्चित गर्न सरकार र सरोकारवालाबीच सहकार्य अपरिहार्य रहेको धारणा व्यक्त गर्नुभयो।
कार्यक्रममा विशेष अतिथिका रूपमा उपसभामुख माननीय बबिता राउत ईशरज्यूको उपस्थिति रहेको थियो। समापन मन्तव्यको क्रममा उपसभामुख ईशरले लैङ्गिक उत्तरदायी बजेटले महिलाको जीवनस्तरमा दीर्घकालीन सुधार ल्याउने विश्वास व्यक्त गर्नुभयो। साथै, यस्तो पहलले नीति तथा कार्यक्रमहरूमा महिलाको पहुँच र प्रभावकारिता बढाउनेमा जोड दिनुभयो।
छलफल कार्यक्रममा प्रदेशसभाका प्रमुख सचेतकहरू, पूर्व मन्त्रीहरू लगायत २५ जना मधेस प्रदेशसभा सदस्यहरूको सक्रिय सहभागिता रहेको थियो। कार्यक्रमको सञ्चालन अधिवक्ता सागर पाठकले गर्नुभएको थियो।
कार्यक्रमको उद्देश्यबारे यु.एन. वुमेनका सन्तोष आचार्यले प्रकाश पार्नुभएको थियो भने लैङ्गिक उत्तरदायी बजेट सम्बन्धी प्रस्तुतिकरण डा. संग्राम सिंह लामाद्वारा प्रस्तुत गरिएको थियो।
छलफलका क्रममा सहभागीहरूले लैङ्गिक उत्तरदायी बजेट निर्माण, कार्यान्वयन र अनुगमनमा सरोकारवाला निकायहरूको भूमिकाबारे विचार आदानप्रदान गरेका थिए।
उक्त अन्तरक्रियात्मक कार्यक्रमले प्रदेशस्तरीय नीति निर्माणमा लैङ्गिक समावेशिता सुनिश्चित गर्न बजेट निर्माण प्रक्रियामा महिला तथा अन्य लैङ्गिक समूहको आवाज समावेश गर्ने आवश्यकता बारे गहिरो छलफल र मार्गदर्शन प्रदान गरेको आयोजक संस्थाले जनाएको छ।
Discussion about this post