गिरिजानन्द साह/जनकपुरधाम/चैत १० गते। अनलाइन मिडिया, युट्युब तथा पत्रकारिता क्षेत्रका समसामयिक विषयहरूमा केन्द्रित एक दिवसीय अभिमुखीकरण तथा छलफल कार्यक्रम जनकपुरधाममा सम्पन्न भएको छ। संचार तथा सूचना प्रविधि मन्त्रालयको सहसचिव कोषहरी निरौलाको अध्यक्षतामा सम्पन्न उक्त कार्यक्रममा पत्रकारिता क्षेत्रका विविध पक्षहरूमाथि गहन छलफल गरिएको थियो।
कार्यक्रमको उद्घाटन मधेश प्रदेशका मुख्यमन्त्री सतिश कुमार सिंहले गरेका थिए। उनले पत्रकारिता क्षेत्रलाई प्रविधिसँग जोड्दै यसको विश्वसनीयता, उत्तरदायित्व र प्रभावकारिता बढाउनु आवश्यक रहेको उल्लेख गरे। साथै अर्मादित रुपमा पत्रकारिता गर्नेहरुका कारण सही र मर्यादित रुपमा पत्रकारिता गरिरहेकाहरुको जिवन ओझेलमा परिरहेको बताए । उनले अहिले पत्रकारिता सहि छ कि गलत त्यसलाई ठम्याउन मुस्किल भएको बताए । ‘अहिलेको समयमा पत्रकारिता माथिको विश्सनियता दिन प्रतिदिन घटी रहेको छ । किन घटिरहेको छ ? आजपनि त्यहि पत्रकारिता छ, त्यहि पेपर छ तर पनि विश्वसनीयता घटिरहेको छ’, उनले अगाडि भने, ‘यदि तपाई मेरो प्रति साकारात्मक हुनुहुन्छ भने मेरो गलत कुरालाई पनि सहि ढंगले लेख्नुभयो मेरो प्रति नाकारात्मक हुनुहुन्छ भने मेरो सहि कुरालाई पनि नाकारात्मक रुपमा प्रस्तुत गर्नुहुन्छ ।’
कार्यक्रममा गृह, संचार तथा कानुन मन्त्रालय, मधेश प्रदेशका सचिव जय कुमार घिमिरे, प्रेस काउन्सिलका रमतुल्ला मिया, नेपाल पत्रकार महासंघ धनुषाका अध्यक्ष पुरन साह, तथा महासंघका केन्द्रिय सदस्य राजेश कुमार कर्ण अतिथिको रूपमा सहभागी भएका थिए। उनीहरूले पत्रकारिता पेशाको वर्तमान चुनौती, सामाजिक सञ्जालको प्रभाव, अनलाइन मिडियाको विश्वसनीयता, प्रेस स्वतन्त्रता र कानुनी पक्षहरूबारे आफ्ना धारणा राखेका थिए।
कार्यक्रममा विभिन्न सञ्चारमाध्यममा आवद्ध पत्रकारहरूको उल्लेखनीय उपस्थिति रहेको थियो। सहभागीहरूले अनलाइन मिडिया तथा युट्युब जस्ता डिजिटल प्लेटफर्महरूलाई व्यवस्थित बनाउने तथा पत्रकारिता क्षेत्रमा विश्वसनीयता र निष्पक्षता कायम राख्ने विषयमा गम्भीर छलफल गरेका थिए।
यस प्रकारका कार्यक्रमहरूले पत्रकारहरूलाई समसामयिक विषयमा सचेत बनाउन सहयोग पुग्ने भन्दै आयोजक पक्षले आगामी दिनमा पनि यस्ता अभिमुखीकरण तथा छलफल कार्यक्रमलाई निरन्तरता दिने प्रतिवद्धता जनाएको छ।
Discussion about this post