पुस १८ गते। बिहीबार बिहान गौशलास्थित होटल बागमतीमा मृत फेला परेकी एक युवतीको हत्या भएको आशंकामा प्रहरीले छानबिन थालेको छ । आज बिहान गौशलाको पिंगलास्थानस्थित होटल बागमतीको कोठा नम्बर ३०८ का एक युवतीको शव फेला परेको थियो ।
मंगलबारदेखि उक्त होटलमा बसिरहेकी काठमाडौंको कागेश्वरी मनोहरा नगरपालिकाकी २२ वर्षिया सुस्मिता खड्काको शव फेला परेको थियो । स्थानीय जनप्रतिनिधिसहितको उपस्थितिमा ढोकाको ताल्चा तोडेर हेर्दा युवती मृत भेटिएको काठमाठडौँ प्रहरी परिसरले जानकारी दिएको छ। सुस्मितासँग कोठामा उनका केटा साथी समेत बसेको प्रहरीको अनुसन्धानका क्रममा खुलेको छ । मृत्युपछि भने ती युवक चाबी लगाएर भागेको देखिएको प्रहरीले जनाएको छ ।
मृतक खड्कासँग बसिरहेका युवक जापानबाट फर्किएको खुलेको प्रहरी स्रोतले जनाएको छ । सुस्मिता पनि जापान जाने तयारीमा रहेको खुलेको छ । प्रहरीका अनुसार घटना शंकास्पद देखिएको छ । आत्महत्या भन्दा पनि हत्याजस्तो देखिएको प्रहरीको प्रारम्भिक निष्कर्ष छ । जिल्ला प्रहरी परिसर, काठमाडौं, काठमाडौं उपत्यका अपराध अनुसन्धान कार्यालय र प्रहरी वृत्त गौशालाबाट थप अनुसन्धान भइरहेको छ।
Discussion about this post