सिराहा–धनुषा जोड्ने कमला पुलको निर्माण सम्पन्न गर्न मुख्यमन्त्रीलाई सात दिनको अल्टिमेटम

श्रावण २७ गते। हुलाकी सडक कमला पुल निर्माण संघर्ष समिति सिराहा–धनुषा जोड्ने कमला पुल पुनः निर्माणमा भएको ढिलाइप्रति ध्यानाकर्षण गराउन मधेस प्रदेशको मुख्यमन्त्री कार्यालय पुगेको छ । सो समितिले आइतबार मुख्यमन्त्री सतिशकुमार सिंहलाई ज्ञापन पत्र बुझाएको छ । सात दिनभित्र माग पुरा नभए भदौ ४ गतेदेखि मुख्यमन्त्री कार्यालय अगाडि आमरण अनसन बस्ने चेतावनी समेत समितिले दिएको छ । निर्माण भइसकेको कमला पुल सञ्चालनमा नआउँदै भासिएपछि अझै पुनः निर्माण भएको छैन । निर्माण कम्पनीले काम हुँदैछ भने पनि हालसम्म पुल निर्माण नभएको सङ्घर्ष समितिका संरक्षक रामरिझन यादवले बताए ।

हुलाकी राजमार्ग अन्तर्गत सिराहा र धनुषा जोड्ने कमला नदीको पुल २०७८ असारमा भासिएको थियो । पुल भासिएको तीन वर्ष भए पनि त्यसको पुनः निर्माण भएको छैन । सो पुल निर्माणका लागि प्रधानमन्त्रीदेखि विभागीय मन्त्रीहरूले पटक–पटक प्रतिबद्धता जनाए पनि निर्माण हुन सकेको छैन । पुलको निर्माण लुम्बिनी बिल्डर्सले गरेको थियो । सो कम्पनीले पुल पुनः निर्माण गर्ने प्रतिबद्धता जनाएर काम सुरु गरे पनि विभिन्न बहानामा ढिलाइ भइरहेको संरक्षक यादवले बताए । धनुषा र सिराहाका लागि लाइफलाइन मानिएको हुलाकी सडक अन्तर्गतको सो पुल निर्माण गर्नमा सरकारले उदासीनता देखाएका कारण सङ्घर्ष समितिले आन्दोलनको सुरुवात गरेको उनले बताए ।

संघर्ष समितिका संयोजक प्रवीण यादवको नेतृत्वमा सिराहाको बसपिटा चौकबाट झोलुङ्गे पुल हुँदै कमला नदी पार गरी मोटरसाइकल र्‍यालीसहित आन्दोलनकारीहरू मुख्यमन्त्री कार्यालय अगाडि पुगेका हुन् । ज्ञापन पत्र बुझाउन पूर्वमन्त्री एवं नेकपा (एस) का नेता रामचन्द्र झा, मधेस प्रदेशका प्रदेशसभा सदस्य प्रमोद यादव, नेता लाल गोइतलगायतका नेताहरू मुख्यमन्त्री कार्यालय पुगेका थिए ।