डिप ट्युबेलको ट्रान्सफर्मर चोरी भएपछि किसानले सिँचाइ गर्न पाएनन्

धनुषा/जेठ २ गते। सिँचाइका लागि महोत्तरी र धनुषाका किसानले जडान गरेका आठ ‘डिप ट्युबेल’का ट्रान्सफर्मर चोरी भएका छन्। ट्रान्सफर्मर चोरी भएपछि सिँचाइ गर्न नपाएको उनीहरूले बताएका छन्।

मधेश प्रदेश भूमिगत जलस्रोत तथा सिँचाइ विकास डिभिजन कार्यालय महोतरीद्वारा महोत्तरी तथा धनुषाका विभिन्न ग्रामीण क्षेत्रमा जडान गरिएको डिपट्युवेलका ट्रान्सफर्मर चोरी भएको सो कार्यालयले जनाएको छ।

दुवै जिल्लाका डिप ट्युबेलबाट चोरी भएका ट्रान्सफर्मर खोजी गर्न प्रहरी प्रशासनलाई पटकपटक लिखित एवं मौखिक जानकारी गराए पनि कुनै पहल नभएको सिँचाइ विकास कार्यालयका अधिकारीले गुनासो गरेका छन्।

चालु आर्थिक वर्षमा पाँचवटा तथा गत आवमा तीनवटा ट्रान्सफर्मर चोरी भएका हुन्। कार्यालयका इन्जिनियर अमलेश यादवका अनुसार चालु आवमा औरही गाउँपालिका–२, देउरीपरवाहा धनुषा, नगराईन नपा फुलगामा धनुषा, मटिहानी नगरपालिका–२ धिरापुर महोत्तरी, भङ्गाहा नगरपालिका–४ पशुपतिनगर महोत्तरी, वलवा नपा–९ अध्ययनपुर महोत्तरीमा जडान गरिएका डिपट्युवेलका ट्रान्सफर्मर चोरिएका हुन्।

त्यसैगरी गत आव मा धनुषाधाम नपा–४ धनुषा, हंसपुर नपा-५ सुुगानिकास धनुषा तथा नगराइन नपा फुलगामा जडान भएका ट्रान्सफर्मर हराएका थिए । एउटा ट्रान्सफर्मर जडान गर्न पाँच लाख खर्च लाग्ने गरेको छ।

धनुषा र महोत्तरीमा ४१ वटा डिपट्युवेल जडान गरेर सिँचाइ भइरहेको छ। एउटा डिप ट्युबेलबाट ४० हेक्टर जमिनमा सिँचाइ हुने गरेको छ। एउटा डिप ट्युबेलको निर्माण तथा सञ्चालनमा ७० देखि ९० लाखसम्म खर्च हुने गरेको छ।

कार्यालयबाट जाडन भएका ८० वटा पावर ड्रिल ट्युबेल प्रयोग गरी सिँचाइको व्यवस्था भएको छ । एउटा ड्रिल ट्युबेलबाट तीन हेक्टर जमिन सिँचाइ गर्न सकिन्छ । त्यसको लागत रु १५ लाख छ । यहाँका किसानले डिप ट्युबेल जडानका निम्ति अनुरोध गर्दै आएको कार्यालय प्रमुख नयन पोखरेलले बताए।