राष्ट्रपति पौडेलको जनकपुरधाम भ्रमण स्थगित

जनकपुरधाम/जेठ २४ गते। यही जेठ ३१ गते हुने भनिएको राष्ट्रपति रामचन्द्र पौडेलको जनकपुरधाम भ्रमण तथा अभिनन्दन स्थागन भएको छ।

भ्रमणको व्यवस्थापनको जिम्मा लिएको जनकपुरधाम उपमहानगरपालिकाका प्रमुख मनोजकुमार साहले मौसमको प्रतिकुलता र राष्ट्रपति पौडेलको स्वास्थ्य अवस्थालाई मध्यनजर गर्दै तत्कालका लागि भ्रमण स्थगन गरेको जानकारी दिए।उनले राष्ट्रपति कार्यालयबाट मंगलबार साँझ फोनमार्फत उनको जनकपुरधाम भ्रमण स्थगित गरिएकोबारे जानकारी प्राप्त भएको बताए । उनले भने, ‘हामीलाई राष्ट्रपतिको कार्यालयबाट नै वहाँको जनकपुरधाम भ्रमण नहुनेबारे फोनमार्फत जानकारी प्राप्त भएको छ ।

राष्ट्रपतिको कार्यालयले मौसम प्रतिकूलताका कारण भ्रमण स्थगित गरिएको जानकारी दिएको हो । भ्रमणको अर्को मितिबारे हामीलाई औपचारिक जानकारी गराइएको छैन । सम्भवतः अर्को महिना वहाँको जनकपुरधाम भ्रमण हुनेछ ।’

‘भ्रमणको विषयमा बृहत् छलफलका लागि बुधबार बिहान धनुषाका सबै सांसद र पालिका प्रमुख लगायतकालाई बोलाएका थियौँ त्यो पनि स्थगित भएको छ’, उनले भने। ​अनुकुल मिलाएर राष्ट्रपति भ्रमण चाँडै गराउने पनि उनले बताए।

नागरिकता विधेयक प्रमाणीकरण गरेसँगै राष्ट्रपतिलाई जनकपुरमा अभिनन्दन गर्ने तयारी गरिएको थियो। सर्वोच्च अदालतले नागरिकता विधेयक कार्यान्वयन नगर्न अल्पकालीन अन्तरिम आदेश दिएको छ।