मंसिर ११ गते। पर्सामा चुनावमा विजयी भएकालाई समर्थकले खुशीयालीमा चाँदीको मुकुट पहिर्याएर बधाई र सम्मान गर्ने प्रचलन यसपालि पनि देखिएको छ।
पर्सा क्षेत्र नम्बर ४ मा नेपाली कांग्रेसबाट निर्वाचित रमेश रिजाललाई आइतबार एक समर्थकले चाँदीको मुकुट लगाएर बधाई दिनुका साथै सम्मान गरेका छन्।
निर्वाचित भएपछि मतदातालाई धन्यवाद ज्ञापन गर्न आइतबार साँझ धोबिनि गाउँपालिका-३ हरिहरपुरमा पुगेका रिजाललाई धोबिनी गाउँपालिकाकी उपाध्यक्ष मन्जु देवीले चाँदीको मुकुट पहिर्याएर बधाई दिनुका साथै सम्मान गरेकी कांग्रेसका क्षेत्रीय सचिव बिलष्टर अहमदले बताए। गाउँपालिका उपाध्यक्ष मन्जु देवी कांग्रेस नेतृ पनि हुन्।
यसअघि पर्सामै गत स्थानीय तहको निर्वाचनमा वीरगन्ज महानगरपालिकाको मेयरमा निर्वाचित राजेशमान सिंहलाई पनि निवर्तमान सांसद प्रदीप यादवले बधाई दिने क्रममा चाँदीको मुकुट लगाई दिएका थिए।
त्यसअघि २०७४ को निर्वाचनमा पर्सा क्षेत्र नम्बर १ मा प्रतिनिधिसभा सदस्यमा निर्वाचित प्रदीप यादवलाई पनि विजय जुलुशका क्रममा वीरगन्ज महानगरपालिका-१५ मा उनका समर्थकले चाँदीको मुकुट लगाई दिएर बधाई दिँदै सम्मान गरेका थिए।
स्रोत-अन्नपूर्ण पोस्ट बाट
Discussion about this post