भरतपुर/भदौ १५ गते। रसुवास्थित भोटेकोशी नदीमा आएको विनाशकारी बाढीबाट प्रभावितहरूका लागि राहत सामग्री सङ्कलन तथा व्यवस्थापन गर्न चितवनको भरतपुरमा राहत सङ्कलन कक्ष स्थापना गरिएको छ।
सहायता गर्न इच्छुक व्यक्ति तथा संघ-संस्थाहरूले प्रधानमन्त्री दैवी प्रकोप उद्धार कोष र प्रधानमन्त्री राहत कोषको आधिकारिक बैंक खातामा नगद जम्मा गर्न सक्नेछन्। त्यसैगरी, जिन्सी (खाद्यान्न, लत्ताकपडा आदि) सामग्री सहयोग गर्न चाहनेहरूका लागि जिल्ला प्रशासन कार्यालय चितवनको पहलमा सङ्कलन तथा व्यवस्थापन कक्ष स्थापना गरिएको हो।
जिल्ला प्रशासन कार्यालय चितवनका प्रशासकीय अधिकृत मदन लामा थिङका अनुसार भरतपुर-१० स्थित चितवन उद्योग सङ्घको सभाहलमा सोमबारदेखि राहत सङ्कलन तथा व्यवस्थापन कक्ष औपचारिक रूपमा सञ्चालनमा आउनेछ।
मुग्लिन–काठमाडौँ सडकखण्डअन्तर्गत कृष्णभीरमा सडक भासिएर सवारी आवागमन पूर्ण रूपमा अवरुद्ध भएको छ। यस्तो अवस्थामा प्रभावित क्षेत्रसम्म सिधै राहत सामग्री पठाउन सहज नभएकाले दाताहरूको सुविधा र व्यवस्थित वितरणका लागि भरतपुरमै सङ्कलन केन्द्र बनाइएको प्रशासकीय अधिकृत थिङले जानकारी दिए।
Discussion about this post