अलपत्र यात्रुको उद्धारका लागि काठमाडौं महानगरपालिकाद्वारा निःशुल्क यातायात सेवा सुरु

काठमाडौं/भदौ १३ गते। काठमाडौं महानगरपालिकाले बाढीग्रस्त क्षेत्रमा अलपत्र परेका यात्रुहरूलाई स्थलमार्गबाट उद्धार गर्न निःशुल्क यातायात सेवा सुरु गरेको छ।

शुक्रबार एउटा गाडीबाट सुरु गरिएको उक्त सेवाको पहिलो दिन २ जना बालबालिका, ९ जना महिला र ८ जना पुरुष गरी कुल १९ जनालाई काठमाडौँ ल्याइएको थियो। आज (शनिबार) देखि थप एउटा गरी दुई वटा सवारी साधन सञ्चालनमा ल्याइएका छन्।

सञ्चालित दुई गाडीमध्ये एउटा रसुवादेखि काठमाडौं यात्रु ओसार्दै आएको १९ सिट क्षमताको (००६ ख ९३३९ नम्बर) गाडी हो भने अर्को महानगरपालिकाको अनुरोधमा छत्रपाटी निःशुल्क चिकित्सालयले उपलब्ध गराएको १० सिट क्षमताको (०३० च ७३६४ नम्बर) गाडी हो। निःशुल्क सञ्चालित यी सवारी साधनलाई सहजै चिन्न सकियोस् भन्नका लागि अगाडि र पछाडि ब्यानर राखिनुका साथै दुवै गाडीमा नगर प्रहरीसमेत खटाइएको छ।

आवश्यकताका आधारमा सवारी साधनको सङ्ख्या अझ बढाउँदै लैजाने महानगरको योजना छ। सवारी साधनमा खटिएका जनशक्तिलाई विपद् व्यवस्थापनमा प्रोत्साहित गर्न आज काठमाडौं महानगरपालिकाकी कार्यवाहक प्रमुख सुनिता डङ्गोल, प्रमुख प्रशासकीय अधिकृत मुक्तिराम अर्याल, प्रवक्ता नवीन मानन्धर र विपद् व्यवस्थापन समितिका संयोजक प्रेम थापा राष्ट्रिय सभा गृह पुगेका थिए।

यो सेवा मुख्य गरी नुवाकोटको विदुर नगरपालिकादेखि काठमाडौं महानगरपालिकासम्म सञ्चालन हुनेछ। कामको सिलसिलामा रसुवा, नुवाकोट लगायत बाढी प्रभावित क्षेत्रमा पुगेर विपद्पछि अलपत्र परेका र काठमाडौं फर्कन चाहने व्यक्तिहरू तथा प्रभावित क्षेत्रमा आफन्तको खोजीका लागि काठमाडौंबाट जानुपर्ने व्यक्तिहरूलाई लक्षित गरी यो सेवा थालिएको हो।

यी सवारी साधनले दैनिक दुई पटक यात्रु ओसार्ने महानगरपालिकाले जनाएको छ।